Босански психолог: „Денешните родители ретко наоѓаат време за децата, па ги обвинуваат наставниците за проблемите“
„Воспитувањето бара време, бара труд и бара работа, првенствено врз себе, а дури потоа на децата. Се плашам дека денешните родители немаат увид колку труд е потребно за да се воспита едно дете“ – вели клиничкиот психолог Данијела Остојиќ.
Данијела Остојиќ е босански клинички психолог со долгогодишно искуство во работата со деца и семејства, а неодамна нејзина изјава доби голем број пофалби на социјалните мрежи.
Таа пред извесен период на BN Televizija зборуваше за тоа каква е улогата на родителите во семејството и во воспитувањето на децата.
Во однос на заблудите со коишто родителите денес најчесто се соочуваат во поглед на воспитувањето на децата, Данијела изјави:
„Воспитувањето бара време, бара труд и бара работа, првенствено врз себе, а дури потоа на децата.
Се плашам дека денешните родители немаат увид колку труд е потребно за да се воспита едно дете, а се плашам и дека немаат доволно време.
Затоа што сите сме некако фокусирани врз кариерата, на материјалното, на создавање, на некаков живот што не подразбира вложување време во детето“ – вели таа.
Данијела на својот Инстаграм профил сподели краток исечок од нејзиното гостување каде зборува со кои предизвици најчесто се соочува како психолог.
Таа вели дека, како родители е неопходно да поминуваме најмалку два часа дневно заедно со своите деца.
„Па ние не бараме многу. Тоа се два часа квалитетно дневно време за вие да можете да го познавате, да можете да речете: ‘Јас го познавам своето дете’.
Се плашам дека родителите што доаѓаат кај мене кога имаат некој проблем, дали во училиштето или во однесувањето, тие воопшто немаат увид дека тие се главни и одговорни ликови во таа приказна, туку секогаш бараат изговори.
Или учителката, или професорот, или наставникот, или општеството, или телефонот – сѐ друго им е виновно, само тие не се и ме молат да им го поправам детето за да можат да се вратат на својата рутина во нивните животи.
Тоа не може така. Доволно се само два часа во денот да разговарате со своето дете и да не ви е важно дали добило петка или единица. Тоа воопшто не е важно, туку е важно како детето се чувствувало тој ден.
Дали некој му праќал некои пораки, дали тоа нешто само истражувало на интернет. Со што се занимава тоа ваше дете, што сака да јаде, што не сака да јаде, што сака да прави во текот на тој ден...“ – потенцира Данијела.
Нејзината објава на Инстаграм доби голем број пофалби и позитивни коментари, a нејзините следбеници во голема мера ја поздравија нејзината изјава.
Се согласувате ли?
Погледнете го целото гостување на Данијела (од 5:43):
Б. С. Б. | Црнобело
Би можело да ве интересира:
Препорачуваме
Најчитани неделава
