5 знаци што откриваат дека вашето дете е зависник од компјутер (и начини со кои можете да му помогнете)

Одличниот ученик почнува да покажува послаби резултати во училиштето, до вчера главна преокупација му бил фудбалот, а сега не помислува на ништо друго освен на видео игрите. Не сака да се бања, не сака да јаде, кога не е пред компјутер не знае што да прави со себе... Зависноста од компјутер е многу слична со другите зависности, а најчесто ги погодува најмладите.

Лорен Мак од САД е експерт за безбедност на интернет, а врз основа на долгогодишната работа како специјалист во својата област, таа забележала неколку знаци што се карактеристични за децата и тинејџерите коишто се зависни од компјутер.

Во статија за The Sun, Лорен издвојува шест симптоми на кои што треба да внимавате и коишто би можеле да ви укажат на тоа дека вашето дете има сериозен проблем со зависноста од екран.

Првиот симптом според Лoрен е тоа што детето не покажува никаков интерес за други хобија, па дури ниту за работите што во минатото го интересирале.

Наместо да сака да игра фудбал, да оди на пливање или да црта, прва и главна преокупација на детето му е да седне пред компјутер, да игра игри или да седи на интернет.

„Ова ги ограничува децата да изберат други активности и хобија во кои може да се добри, и во што подоцна би можеле да изградат кариера“ – појаснува Лорен.

Второ, слично како и со другите зависности и кај зависноста од компјутер може да се случи детето да покажува знаци на криза.

Кога не е пред компјутер, детето или тинејџерот станува иритиран, непријателски настроен, со променливо расположение, нема трпение, покажува знаци на депресија, анксиозност и гнев.

Трет знак е тоа што детето станува сѐ помалку загрижено за личниот изглед и хигиената, а зависноста од видео игри и компјутер може да предизвика проблеми и со исхраната.

Четврт знак може да боде слабата концентрација на училиште и неможноста да оствари доволен успех. Детето што претходно имало одлични оценки, наеднаш почнува да покажува загрижувачки резултати.

Петтиот симптом се однесува на начинот на кој што детето комуницира со соучениците и врсниците.

„Детето што е зависно од компјутер може да има проблем да оствари контакт со другите врсници и тоа понатаму може да доведе до сериозни проблеми со менталното здравје“ – вели Лорен.

Доколку родителот забележи некој од овие симптоми кај своето дете, потребно е веднаш да разговара со него за да открие како навистина се чувствува, а потоа заедно да утврдат начин како да се изборат со проблемот.

„Доколку се обидувате да му помогнете на вашето дете да ја надмине зависноста од екраните, бидете сигурни дека и вие ќе го направите истото. Само на тој начин ќе им покажете дека времето што го поминувате без екран може да биде подеднакво забавно“ – вели таа.

За да се надминат моментите на криза најдобро е да одредите активности и стратегии со кои што ќе им помогнете мозокот да им биде зафатен и да не размислуваат на компјутерот.

Тоа не значи дека треба целосно да му забраните на детето да поминува време пред компјутер, но неопходно е да му го ограничите времето и да бидете сигурни дека ќе има можност тоа да посвети време и на другите аспекти од животот што се мошне важни за неговиот развој.

Секако, доколку забележувате некои од овие знаци добро е да побарате и стручна помош. Денес постојат голем број експерти и лица што можат да му помогнат на детето да се избори со зависноста и да се изгради во здрава и ментално силна личност.

Б. С. Б. | Црнобело