5 знаци дека сте избрале погрешен ресторан на одмор (и ќе зажалите за тоа)

Бегајте од ресторани пред кои келнерите стојат и ве канат и обрнете внимание на кој јазик зборуваат присутните гости...

На сите ни се случило да отпатуваме некаде и да се чувствуваме толку гладни, па воопшто и да не размислуваме каде сме седнале да јадеме и какво искуство ќе понесеме со нас.

Свесни сме дека кога сме заминале на одмор, тогаш редно е да пробаме и нешто од локалните специјалитети, но ако не обрнувате доволно внимание, тогаш мошне веројатно е да влезете во некоја ’туристичка замка‘ која нема да ви понуди нешто ексклузивно, а ќе ви го преполови паричникот.

На кои знаци треба да внимавате додека се движите низ европските градови за да не влезете во ресторан кој нема да ви понуди нешто особено, а ќе си заминете разочарани и нервозни?

Во продолжение погледнете ги шесте знаци кои укажуваат дека ресторанот не е тоа што го барате:

Локација

Прво нешто на што треба да обрнете внимание е локацијата на која се наоѓа ресторанот.

Ако е на само неколку чекори од плажата каде што сте уживале преку ден, или во близина на знаменитостите, многу е веројатно да станува збор за локал во кој нема да најдете специјалитети од локалната кујна.

Најчесто ова се ресторани каде има голем број гости минувачи и храната во нив е веќе приготвена или брза за подготовка.

За да пробате оригинална локална кујна, некогаш треба да бидете подготвени да пешачите малку подолго, на места што не се толку прометни.

Келнерите ве канат додека поминувате по улица

Ова е уште еден знак дека ресторанот или локалот се користи со трикови за да привлече што е можно повеќе минувачи и гости.

Особено треба да бидете внимателни ако келнерите ви даваат мени со фотографии или ви нудат попуст.

Зошто некој ресторан каде што храната се троши и што има доволно гости би имал потреба да ги продава своите специјалитети на попуст?

Огромно мени

На многумина им се чини дека долгото мени е знак за добро разработен ресторан каде што гостите имаат голем избор.

Но, тоа не мора да биде така. Тоа може да значи дека голем дел од таа храна е веќе произведена и само по потреба се пече или се загрева набрзина.

Обрнете внимание и на предјадењата. Често се случува похуваните предјадења да не се свежи, туку да биле замрзнати и само да се пржат во моментот.

Не барајте ресторани што се убави за на Инстаграм

Вообичаено луѓето доаѓаат во тие ресторани само за да бидат видени и да ги објават фотографиите на Инстаграм, па ако сте дошле за да пробате нешто автентично и вкусно, може да си заминете разочарани.

Пред да побрзате да го посетите ресторанот што изгледал прекрасно на социјалните мрежи, задолжително е и да проверите какви се препораките за храната таму.

Погледнете ги луѓето што седат внатре

Пред да влезете во некој ресторан, обрнете внимание на населението што седи таму. Ако местото е преплавено само со туристи, тоа најверојатно не е добар знак.

Секогаш обидете се да препознаете дали меѓу гостите има и локално население, кое го зборува локалниот јазик.

Секако, ако сте решени да најдете одлични локални ресторани, наместо да лутате, најдобро е да го консултирате Google и да ги погледнете препораките за местата.

Б. С. Б. | Црнобело