„Завршив Филозофски факултет во Скопје, сите беа против, денес не работам по струка – дали се каам?“

Вечната дилема на секој човек. Дали избрав вистинска професија и дали цел живот ќе го работам она за кое учев...

Како вчера да бирав каде да запишам на факултет. Идеи безброј, сугестии од родители, роднини, пријатели. Друштвото на една страна, јас на сосема друга.

Поделени патишта. Многу дилеми. Дали ќе се снајдам? Дали е тоа она што сакам да го работам? Вреди ли трудот за платите во Македонија? Морам да оформам ново друштво?

И така го превземав ризикот да изберам професија што ја сакам, а не е платена. На твои 18 години мислиш со срцето само, не и со главата. Не слушаш никого, освен себе.

Факултетот беше песна за мене. Со љубов листав страници, расположено полагав испити. Сите рокови запазени.

Не бркав просек и оценки, но затоа сакав брзи резултати. Се заборавав од читање. Литература наоѓав од секаде. Се трудев и вложував во себе.

И така дојде денот кога дипломирав.

Јас горда и среќна, моите загрижени за мојата иднина.

„Потроши убави години на бесцелен факултет”, “Ќе те прашам од што ќе живееш”, “Погрешен избор”… Но, имаше и честитки од срце кои живееле и живеат сè уште со паролата „Работи го она што го сакаш, за да се чувствуваш дека не работиш воопшто”.

Поминаа речиси 20 години од завршување на мојот факултет. Денес, Филозофскиот факултет е далеку од тоа што беше.

Јас далеку од таа што бев.

Денешните генерации се помудри, верувам поразумни и логични, отколку страствени. Би рекла практични.

Сменив многу работни места. Добив различни понуди за работа и доквалификација.

Денес, гордо ќе потврдам дека во целост создадов свој нов профил, неповрзан со факултетот што го завршив.

И не ми е криво за факултетот кој го учев со љубов, а ниту, пак, мојата пасија кон книги се намали.

Напротив. Но, теоријата на моите најблиски се потврди.

Семејство со оваа професија во Македонија не може да се нахрани.

Се пронајдов во нов свет каде што можам гордо да кажам дека напредувам. Секојдневно учам. Како и секој човек. И ќе признаам, уживам.

Содржината и ставовите изразени во авторските текстови и колумни претставуваат лични ставови на авторот и не мора нужно да ги одразуваат ставовите на редакцијата на порталот CRNOBELO.com

©CRNOBELO.com Забрането преземање и копирање. Крадењето на авторски текстови е казниво со закон.

М. У. Т. | Црнобело / фото: pexels.com