Го украле вонземјани, терористички напад – (луди) теории за исчезнувањето на летот 370 на Malаysia Airlines

По речиси девет години, уште никој не знае што се случи со патниците и екипажот од летот 370 на Malaysia Airlines кој исчезна во 2014-та, над Индискиот Океан. Поради ова, постојат секакви теории за исчезнувањето – од терористички напад, до луди шпекулации дека авионот го украле вонземјани или дека се вратил назад во времето низ црна дупка.

Кобниот лет 370 на Malaysia Airlines до денес претставува мистерија која ја буни не само јавноста, туку и експертите.

Авионот со 227 патници и екипаж од 12 лица исчезна на 8 март 2014 година, на лет од Куала Лумпур до Пекинг.

Оттогаш има поминато речиси цела деценија, но никој не успеа да открие што навистина се случило со авионот и неговите патници.

Бидејќи се претпоставува дека патниците и екипажот се мртви, исчезнувањето на авионот се смета за еден од најсмртоносните инциденти на авиокомпанијата Malaysia Airlines.

По исчезнувањето на авионот беше организирана најголемата потрага во историјата на авијацијата, но сите обиди да се најде авионот беа залудни.

Авионот полетал во 12:41 часот, а 20-тина минути подоцна ја достигнал потребната висина.

Пред авионот да влезе во воздушниот простор на Виетнам, бил исклучен неговиот примопредавател – уред со чија помош контролорите ги идентификуваат авионите.

Со помош на радар, било забележано дека наместо да продолжи да се движи во права линија кон Пекинг, авионот свртел и почнал да се движи кон Малезија, пред повторно да ја промени патеката. Скршнувањето се случило во 1:25 часот наутро.

Во 2:22 часот наутро, авионот исчезнал од радарот и последно бил забележан над Андаманското Море.

Сепак, сателит кој орбитирал на Индискиот Океан на секој час добивал сигнали од авионот, а последниот сигнал го добил во 8:11 часот наутро.

Оттука, на авионот му се губи секаква трага.

На 24-ти март, премиерот на Малезија најави дека според добиените сигнали, експертите заклучиле дека авионот најверојатно се срушил во Индискиот Океан, на околу 2.500 километри од брегот на Австралија.

Поради оддалеченоста на потенцијалното место на уривање, потрага не била воопшто лесна.

Во период од неколку години беа пребарани стотици илјади километри квадратни од дното на Индискиот Океан, а беа потрошени и милиони долари.

На почетокот од 2015 година, на бреговите на Африка беа најдени остатоци кои го донела водата и кои наводно се од срушениот авион.

Во 2018 година, властите на Малезија изјавија дека насоката на авионот била променета рачно, но не е познато дали тоа го направиле пилотите или некој друг. Но сепак, останува мистерија зошто и каде исчезна авионот.

Нормално, по исчезнувањето на авионот, се појавија безброј теории, а дел од нив се и по малку налудничави.

Продолжува на следната страница...