На 14 години користел дрога, бил во затвор со Чарлс Менсон, а денес им помага на зависници – Факти за актерот Дени Трехо

Актерот Дени Трехо неколкупати бил во затвор, но откако избегнал смртна казна, решил да си го промени животот. Тој нема допрено ни алкохол ни дрога повеќе од 50 години, а денес е најпознат по улогите на негативци во холивудските филмови.

Дури и да не знаете кој е Дени Трехо, сигурно сте го виделе во барем еден филм и можете да го препознаете.

Актерот (скоро) секогаш глуми негативец и се има појавено во серии како Breaking Bad и Desperate Housewives, но и во филмови како Desperado и From Dusk Till Down.

Во минатото, Дени навистина бил „негативец“ и во приватниот живот – бил зависник од дрога, а поминал и неколку години во затвор.

Но, денес тој е потполно друга личност – над 50 години нема пробано ни дрога ни алкохол, а и активно е вклучен во добротворна работа.

Неколку факти за фасцинантниот живот на 80-годишниот актер:

Во тинејџерските години станал зависник од дрога

Дени Трехо имал мошне тешко детство.

Татко му го малтретирал, почнал да користи марихуана на само осум години, а набрзо потоа и да пие алкохол и да користи дрога како кокаин и хеорин.

Веќе до 14 години, актерот бил зависен од дрога и алкохол.

Првпат отишол на состанок за зависници од алкохол на околу 15 години, и вели дека тоа искуство му ги отворило очите.

„Ми кажуваа дека секојпат кога ќе престанеш да ги потсетуваш состаноците, ќе умреш, ќе полудиш или ќе одиш во затвор.

И, јас им докажав дека се во право – секојпат кога не одев на состаноци, завршував во затвор“.

По многу неуспешни обиди, Дени конечно се ослободил од зависностите, а денес им помага на други луѓе во иста положба.

Поминал неколку години во затвор

Во тинејџерските и 20-тите години од животот, Дени Трехо неколкупати бил во затвор. Тој бил затворан за поседување и продавање дрога, па и за вооружен грабеж.

А, кога последен пат бил во затвор, „за влакно“ избегнал смртна казна.

Имено, во затворот почнал бунт и тогаш актерот удрил полицаец по главата. Како казна, го ставиле во самица и му рекле дека ќе добие смртна казна.

Но, имал среќа бидејќи никој не сакал да сведочи против него.

Откако ја отслужил казната и бил ослободен, актерот целосно си го променил животот и никогаш повеќе не се вратил во затвор.

Во затворот го запознал Чарлс Менсон

Во мемоарите што ги издаде во 2021 година, актерот откри дека имал можност да го запознае Чарлс Менсон.

Во 1961 година, и двајцата биле во истиот затвор, а актерот вели дека Менсон го хипнотизирал.

Наводно, Менсон самиот им рекол на Дени и уште неколку затовреници дека може да ги хипнотизира и да направи да се чувствуваат како да се под дејство на хероин.

„Уште пред да почне со хипнозата, почувствував нешто во устата. Кога Менсон почна да опишува како дрогата ми влегува во крвниот систем, почнав да чувствувам некаква топлина…

Ако Менсон не беше криминалец, мислам дека би бил многу успешен хипнотизер“, пишува актерот.

Првата улога ја добил во 1985 година

Кога Дени Трехо се ослободил од пороците, почнал да им помага на други зависници – им бил еден вид советник и поддршка.

Еден од луѓето на коишто им помагал бил асистент на филмски продуцент, па тој му нашол работа како статист во филмот Runaway Train од 1985-та.

Уште поинтересно е што еден од сценаристите бил со него во затвор.

Сценаристот го пофалил Дени дека е добар боксер, па го најмиле да го тренира главниот актер во филмот.

Бидејќи Дени се покажал како одличен боксер, на крај добил поголема улога во филмот – тој бил противник на главниот актер во една од сцените.

И, ова појавување било доволно за подоцна да биде забележан и од други продуценти и режисери.

Не прифаќа пари ако работи на мал филм

Денес актерот има импресивно резиме, но вели дека кога работи на мал филм со мал буџет, одбива пари.

„Мојот агент ми се лути кога не прифаќам пари. Но, за мене е чест да му помогнам на некој да си ја изгради кариерата.

Кога работам на мал филм, само велам ’плати ми за гориво или купи ми ручек‘. И, потоа го давам најдоброто од себе пред камерата“, открива актерот.

Продолжува на следната страница...