„Само почнав да се хранам поздраво“ – 21-годишна девојка ослабела 47 килограми без диети и броење калории

Детали

сабота, 12 јуни 2021

Кога сакаат да се ослободат од вишокот килограми, повеќето луѓе почнуваат диети или ги бројат калориите што ги внесуваат, но 21-годишната Кејтлин ослабела цели 47 килограми дури откако престанала да следи диети и се фокусирала само на тоа да внесува здрави намирници.

Кејтлин Трик од САД има 21 година, а во детството имала повреда на коленото. Оттогаш нејзината тежина драстично се зголемила и никако не можела да се ослободи од вишокот калории.

Кејтлин пробала 16 различни апликации за броење калории, се обидувала да го ограничи внесот на јаглехидрати, но ова никогаш не ѝ помагало и секогаш им се враќала на старите лоши навики.

Но во 2019-та година, наместо да се мачи со диети и рестрикции, решила да си го промени односот со храната, а токму ова ѝ помогнало да ослаби дури 47 килограми, за само две години.

„Се чувствувам како цел живот да имам прекумерна тежина. Кога помислувам на деновите од детството, сфаќам дека секогаш се чувствував поголема од другите деца и имав проблеми со самодовербата. Почнав да се поправам кога имав 10 години и кога си го повредив коленото. Тогаш речиси и да не се движев, ми беше досадно, а килограмите почнаа да се зголемуваат“.

„Кога ми заздрави коленото, веќе имав развиено лоши навики и постојано мислев што ќе биде следното нешто што ќе го јадам. Колку подебела станував, толку поретко излегував со пријателите, за да можам да седам дома и да јадам. Заглавив во лош циклус“.

Кејтлин пробувала секакви методи за слабеење, но никогаш не можела да издржи до крај.

„Еднаш успеав да ослабам 12 килограми, но набрзо потоа повторно им се вратив на старите навики“.

Пресвртот во нејзиниот живот се случил во 2019-та, кога почнала да оди на факултет.

„Бев излезена и паднав додека трчав да фатам такси. Си го изместив коленото, па морав да одам на лекар кој ми кажа дека ќе треба да ми прават операција. Ми рече дека морам да ослабам 30 килограми ако сакам да ми прават операција. Ова ме натера да сфатам дека морам да направам промена“.

Не знаејќи што друго да прави, Кејтлин ѝ се придружила на локална група луѓе со вишок килограми, кои наместо со диети и броење калории, слабеат со здрава исхрана.

„За две години ослабев 47 килограми и ова ми го промени животот. Како што ми се намалуваше тежината, ми растеше самодовербата. Сега можам да правам едноставни работи кои претходно ми се чинеа невозможни, како да си ги прекрстам нозете и да се качам по скалите без да се задишам“.

Кејтлин открива дека пред да стане дел од групата, во една недела јадела по три големи пици, многу помфрит и колачиња.

„Сега само научив да готвам и со текот на времето одбирав поздрави намирници. Ми се допаѓа тоа што можам да јадам речиси сè, нема никакви ограничувања“.

Откако ослабела, Кејтлин станала и физички поактивна.

„Сакам да одам во теретана неколкупати неделно, возам велосипед и одам на јога часови – работи што не можев да ги правам порано. Можам да одам и на шопинг без да ми стане здодевно бидејќи ништо не ми е точно. Порано не ми беше јасно зошто некои луѓе толку сакаат да купуваат облека, но откако ослабев, и јас го сакам тоа!“

„Слабеењето го промени секој дел од мојот живот. Дипломирам ова лето и сега откако ослабев, единствената цел во животот ми е да бидам среќна и да не трошам ниту една минута залудно. Сакам и да им помогнам и на другите кои биле во иста ситуација како мене. Станав дел од групата за да ослабам, но не очекував дека ќе бидам и послободна и дека ќе ми се промени перспективата за животот. За првпат сум возбудена за мојата иднина“, вели Кејтлин.

Спирова С. | Црнобело