Водопадите на Нијагара осветлени во боите на македонското знаме - Канада им оддаде почит на жртвите во Кочани

Детали

понеделник, 24 март 2025

15 минути водопадите на Нијагара светеа во црвена и жолта боја, во знак на солидарност со Македонија и жртвите од страшната несреќа во Кочани.

Вчеравечер водопадите на Нијагара беа осветлени во црвено жолта боја, како нашето знаме, а во чест на 59-те жртви од пожарот во дискотеката „Пулс“ во Кочани.

Преку Фејсбук страницата „Обединета македонска дијаспора“ беше најавено дека најпознатите водопади во светот, кои се наоѓаат во градот Онтарио, Канада, ќе блеснат во црвено жолтата боја.

„Нијагарините водопади 15 минути ќе бидат осветлени во боите на македонското знаме во чест на жртвите од трагичниот пожар во Кочани.

Се надеваме дека ќе ни се придружите и ќе застанете во знак на солидарност со македонската заедница, додека се сеќаваме и им оддаваме почит на оние што ги загубија животите, како и во молитва за брзо оздравување на сите кои беа повредени и оние кои беа погодени од оваа трагедија“, пишуваше во нивната најава.

На Инстаграм беа споделени и видеа од моментот на осветлувањето на водопадите.

„Канада, ти благодариме. Солидарност за Кочани по страшната несреќа“ - пишува во пораката.

Кликнете на видеото:

И на Твитер беа споделени фотографии  од црвено-жолтите водопади.

Боите на нашето знаме претходно осветлија и неколку градби во Перт и Бризбејн, Австралија.

 

Ноќеска во црвено-жолто светеа и мостот Harbour и кулата Sky Tower во Оукленд, Нов Зеланд.

„Македонското знаме во чест на жртвите од Кочани“ - напиша на Инстаграм Стори Хелена Роза, која ја сподели фотографијата.

Водопадите на Нијагара беа осветлени во боите на македонското знаме и во 2021 година, за одбележување на 30-годишнината од независноста на државата, пишува Toronto Star.

А. Ј. | Црнобело