„Кога ќе ми дојде преку глава од родителството, си земам некој ден одмор“
- Детали
- вторник, 04 февруари 2025
„Беше 18 часот попладне, дневната соба беше тивка, си ставив чаша вино и си пуштив Нетфликс. Децата ги испратив кај баба им и дедо им...“, започнува објавата на една искрена мајка од Велика Британија.
Никол Смит од Велика Британија е мајка на две деца, која за магазинот „Metro“ ја споделува својата филозофија за родителството.
Нејзината исповед, во која ќе се пронајдат и други родители, гласи:
„Беше 18 часот попладне, дневната соба беше тивка, си ставив чаша вино и си пуштив Нетфликс.
Штотуку му помогнав на сопругот да ги стави децата во автомобилот со спакувани пижами за 4-дневното патување кај баба им. Ги бакнав и се поздравив.
Сега, седев на каучот, без притисок дека треба да правам мултитаскинг, од типот да диплам облека, додека одговарам на мејлови и се чувствував благословено, имав време и простор да одморам, без чувство на вина.
Како што знаат сите мајки и татковци, родителството е немилосрдно на моменти.
Плус, јас и мојот сопруг Фил имаме приватен бизнис, па всушност никогаш немаме вистински слободен ден.
Сé досега.
Фил и јас си изградивме систем кој ни дозволува да земеме пауза од семејниот живот и да се фокусираме на нашата работа, но и на пријателствата, креативноста и радоста.
Сосема нормално ни е едниот од нас да замине на ден, на викенд или на една седмица, додека другиот останува сам да се грижи за семејството.
За време на моите кратки паузи јас одам во хотели со СПА, а сум била дури и на патувања во Франција и Шпанија, додека децата биле со баба им и дедо им, а маж ми на работа.
Најмалку еднаш годишно гледаме да отпатуваме сами некаде и обично тоа е за мојот роденден.
Потребно ни е време насамо за да се фокусираме на нас и да престанеме на миг да бидеме мама и тато.
Колку и да сакав да бидам родителот кој постојано пакува здрави оброци за децата и ги носи на планинарење и им ги прави најдобрите проекти за на училиште, едновремено сакав и успешна кариера.
И додека пробував да го балансирам ова работејќи, се чувствував ужасно и сé ми одземаше повеќе време затоа што и најобичните задачи ми се развлекуваа во текот на целиот ден.
Сé се подобри кога одлучивме со сопругот да ги поделиме работните часови во текот на денот, а додека едниот работи, другиот комплетно сам да ги чува децата и обратно.