Минијатурна елка, робот со дедомразовска капа: Божиќ на Меѓународната вселенска станица (фото)

Детали

среда, 25 декември 2024

Иако двајца од астронаутите се заглавени на Меѓународната вселенска станица до март, сепак не дозволиле тоа да им го расипе Божиќ, па прославија со петте колеги кои се со нив во орбита.

Моментално на Меѓународната вселенска станица се наоѓаат седум астронаути, а синоќа (24.12) и тие имаа бадникова вечера по повод католичкиот Божиќ.

Иако двајца од астронаутите – Суни Вилијам и Буч Вилмор – се заглавени на станицата до март, сепак изгледа дека барем празничната сезона ја поминуваат добро.

Суни и Буч, заедно со двајца од колегите, Ник Хаг и Дон Петит, снимија видео со божиќна порака кое е споделено и на Јутјуб.

Секој од астронаутите им посакува среќен Божиќ на оние кои слават и сите истакнуваат дека за празниците им недостасуваат семејствата.

„Знаете дека празничната сезона треба да се помине со пријателите, семејството и саканите.

Годинава ние ќе бидеме во орбита далеку од нив, па сакаме да им посакаме среќен Божиќ и се надеваме дека ќе имате прекрасен празник“, вели астронаутот Ник.

Тој сподели и фотка на Твитер од божиќната вечера.

„Кога мислам на празниците, мислам на божиќните вечери, со семејството и пријателите собрани за вкусен ручек и десерт“, пишува во објавата.

Ник покажа и како изгледа минијатурната елка на Станицата, како и подароците за астронаутите.

„На станицата нема трчање до продавница во последен момент…

Тим џуџиња ги спакува подароците пред шест месеци!“

ОД НАСА, пак, споделија фотка од робот кој се наоѓа на станицата кој си добил дедомразовска капа, иста како на астронаутите.

Од агенцијата исто така им го честитаа Божиќ на католиците со фотографија од зелена маглина која наликува на елка.

Спирова С. | Црнобело