60-годишни жени од Шпанија мислеле дека се во врска со Бред Пит - Како измамници им зеле над 320.000 евра?

Детали

четврток, 26 септември 2024

Ако Бред Пит ве убеди дека ве сака, ќе му дадете 150.000 евра за бизнис, нели? Или, можеби не... Како и да е, две 60-годишни жени наседнале на трикот на онлајн измамници и останале посиромашни за околу 325.000 евра.

Јасно е дека на шармот на Бред Пит никој не може да одолее... Шпанските и светските медиуми ја пренесуваат приказната како две жени во Шпанија кои имале над 60 години останале посиромашни за вкупно 325.000 евра, откако со месеци наназад верувале дека се во „онлајн“ врска со холивудскиот заводник.

Иако, нивниот идентитет не се соопштува во јавноста, приказната на овие две жени привлече огромно внимание во целиот свет, откако се дозна како „Лажниот Бред Пит“ успеал да им земе голем дел од животната заштеда.

Властите во Шпанија, деновиве уапсиле пет лица за кои се верува дека вршеле интернет измама, лажно претставувајќи се како Бред Пит на социјалните мрежи.

Целта им била да најдат наивни жртви, кои ќе веруваат дека започнале романтична врска со холивудскиот актер.

Иако, на прв поглед ви изгледа неверојатно дека некој би наседнал на оваа измама, две жени на возраст над 60 години биле измамени од криминалната мрежа.

Како што појаснуваат шпанските медиуми, измамниците со месеци ги проучувале профилите на социјалните мрежи на жените, а откако започнале онлајн врска со нив, почнале да бараат пари од нив за наводни инвестиции.

Лажниот Бред Пит, со кого биле во врска, од нив барал да префрлат пари за нивните инвестиции и проекти (кои што воопшто не постоеле).

Во Шпанските медиуми е објавена фотката која ја добивале жртвите, на кои наводно Бред Пит држи ливче на кое на шпански пишува:

„Мила, навистина те сакам. И ветувам дека ќе ти платам сè. Да, мила, те сакам. Секогаш ќе бидам тука за тебе, убавице моја“...

Жените, кои верувале дека ќе имаат блескава иднина со еден од најголемите заводници во Холивуд, префрлале пари за да му помогнат на својот сакан.

Првата жена од Гранада, Шпанија, вкупно загубила 175.000 евра, а втората од Визкаја, загубила 150.000 евра.

Двете жени го пријавиле случајот во полиција, а властите откриле дека се работи за добро организирана криминална структура, со разработен план за финансиски криминал, фалсификувани документи, офшор сметки итн.

Засега, властите успеале да вратат околу 85.000 евра, а сè уште се трага по остатокот.

Б. С. Б. | Црнобело