Во домот на Тео: „Работната маса во дневната беше промашување, проекторот во спалната соба е полн погодок“

„Спалната соба доби големо редизајнирање. Работното биро сега е фиксирано и замени една од наткасните. Минималистичкото биро со закосени дрвени ногарки и бела основа е совршено за скандинавскиот стил на просторијата. Скриените кабли и украсните детали го одржуваат просторот уреден и стилски“, вели Тео од Скопје, откако го преуреди својот дом.

Тео Трпевски (35) живее во модерен стан од 52m² во населбата Карпош 3 во Скопје уреден во бохо и скандинавски стил, со многу детали.

Тие му даваат топлина на просторот и го прават пријатно катче за живеење.

„Станот се простира на 52m², со внатрешен простор од 42m², во скандинавски стил, комбиниран со елементи на бохо естетика.

Има мирис на бебешка пудра и ванила која е во мали дози и делува смирувачки, како да сте завиени во меко ќебенце.

Дневната соба е срцето на домот, отворен простор поврзан со два ходника и отворена кујна“ - вели Тео за својот дом.

Една година откако ги отвори вратите на својот дом за CRNOBELO.com, Тео направи мали измени, со кои му даде малку поинаков лик на просторот.

Во однос на промашувањата во уредувањето на домот, вели:

„Иако немам големи промашувања, размислувам дека туш кабината, која беше дел од станот кога го купив, можеби е еден од нив.

Квалитетот на изведбата не е на ниво, а и изборот на плочки во тоалетот е малку обичен и досаден.

Во иднина, сакам да внесам промени што ќе му дадат spa вибрации на просторот.

На пример, за подот би избрал плочки во имитација на дрво, кои би додале топлина и природна атмосфера.

Ѕидовите би ги освежил со водоотпорна боја или тапети, а во туш кабината мали светли шестоаголни плочки би внесле доза на софистицираност.

Дополнително, сите чешми ги заменив со модели во златна или бакарна боја, заради елеганција и луксузен изглед“.

Во однос на добрите одлуки и погодоците во самото уредување, за CRNOBELO.com Тео открива:

„Еден од најдобрите избори од првичното уредување на станот е светлиот мебел.

Тој не само што просторот го прави визуелно поголем, туку и внесува свежина, дури и во темни услови, избегнувајќи ја таа депресивна атмосфера што може да ја создаде темниот ентериер.

Покрај тоа, декоративните светла кои ги користам носат топлина и разновидност, а smart home уредите се апсолутен фаворит - поврзаноста меѓу уредите ми овозможува лесно и ефикасно да управувам со секојдневните активности.

На пример, можам да ги вклучам или исклучам уредите додека сум надвор од дома или да затворам ролетни кога заборавам дека комшиите може да ме видат карши прозорецот - ситуација која веќе не ми предизвикува грижи“.

Прочитајте кои промени ги направи Тео изминатата година, но и грешките што ги коригираше:

„Во светот на ентериерното уредување, деталите и промените го носат карактерот на просторот.

Моето патување со домот продолжува со мали, но значајни измени кои ја подобруваат практичноста и естетиката.

Еве што се промени низ просториите:

Дневна соба: Простор за релаксација

Дневната соба остана централна точка на уживање, но со мали промени кои носат свежина.

Додадов нови видови цвеќиња, како Ficus Benjamina, Ficus Elastica, Zamioculcas zamiifolia и Epiperium Pothos, кои одлично се прилагодуваат на помалку светлина.

Аранжманот ги следи правилата на триаголник - највисокото растение е во средина и тоа дава визуелен баланс.

Отстранувањето на „привремената“ работна маса беше големо олеснување.

Иако минималистичкиот iMac е прекрасен, самиот процес на поставување и собирање со сите кабли беше непрактичен.

Сега, дневната соба е простор за релаксација и забава со Nintendo - совршена за игри како Animal Crossing и Legend of Zelda.

Продолжува на следната страница...