Шведска овозможува породилно отсуство за бабите и дедовците – ќе добиваат пари за да се грижат за внуците
- Детали
- понеделник, 15 јули 2024
Според нов закон во Шведска, родителите можат да префрлат денови од нивното породилно отсуство на бабата или дедото на детето. Односно, бабата или дедото ќе добиваат исплата за да се грижат за внуците, додека да наполнат четири месеци.
Кога станува збор за породилно отсуство, малку држави можат да се споредат со Шведска.
Шведска е првата земја во светот која воведе породилно отсуство за татковци, и тоа уште пред 50 години.
Сега, со нов закон донесен на почетокот јули, шведските власти одат чекор подалеку и овозможуваат еден вид породилно отсуство за бабите и дедовците.
Според новиот закон, родителите ќе можат да го поделат породилното отсуство со бабите и дедовците на бебето.
Односно, дел од деновите од нивното породилно отсуство може да бидат префрлени за бабата или дедото.
Бабите и дедовците ќе може да го искористат породилното отсуство во првите три месеци од животот на бебето.
Во семејствата со двајца родители, може да се префрлат до 45 дена, додека самохраните родители можат да префрлат до 90 дена од нивното породилно отсуство.
За ова, бабите и дедовците ќе добиваат и паричен надомест – исто како родителите кои се на породилно.
За потсетување, родителите во Шведска добиваат 480 денови породилно отсуство.
390 денови од отсуството добиваат исплата пресметана според нивната плата, додека останатите 90 добиваат по 17 долари дневно.
Тие имаат и други бенефити – можат да работат со скратено работно време додека детето да наполни осум години.
Владините работници, пак, добиваат скратени работни часови до 12-тиот роденден на детето.
Бабите и дедовците кои ќе користат породилно отсуство треба да исполнуваат некои услови.
Најпрво треба да имаат здравствено осигурување, а додека ја користат исплатата, не треба да бараат работа.
Исплатата, пак, се пресметува врз основа на нивната пензија.
Според Voice of America, околу 30% од татковците во Шведска го користат породилното отсуство, а се очекува интересот да биде дури и поглем кај бабите и дедовците.
Што мислите за законите за породилно отсуство во Шведска?
Спирова С. | Црнобело
Би можело да ве интересира:
![](https://www.crnobelo.com/media/com_jvrelatives/images/thumbs/com_content_106710_400.jpg)
![](https://www.crnobelo.com/media/com_jvrelatives/images/thumbs/com_content_103877_400.jpg)
![](https://www.crnobelo.com/media/com_jvrelatives/images/thumbs/com_content_109098_400.jpg)
![](https://www.crnobelo.com/media/com_jvrelatives/images/thumbs/com_content_105874_400.jpg)
![](https://www.crnobelo.com/media/com_jvrelatives/images/thumbs/com_content_107923_400.jpg)
![](https://www.crnobelo.com/media/com_jvrelatives/images/thumbs/com_content_106644_400.jpg)