Грозоморно злосторство во Италија: Тинејџери силувале 13-годишно девојче, политичарите бараат хемиска кастрација

Детали

среда, 07 февруари 2024

По страшното силување на 13-годишо девојче во Италија, неколку италијански политичари побараа силувачите да се казнат со хемиска кастрација. Бидејќи напаѓачите биле Египќани кои престојувале во земјата нелегално, сега јавноста бара и построги казни за овој прекршок.

Веста за силувањето на 13-годишно девојче од Италија ја потресе Европа, а наводно италијанскиот вицепремиер Матео Салвини бара хемиска кастрација за злосторниците.

„Не ми зборувајте за ’толеранција‘ или ’грешка‘. Пред вакви ужасни ситуации, не може да има помилување, туку само еден лек – хемиска кастрација“, изјави тој за италијанските медиуми.

Исто барање имал и друг член на неговата партија, кој смета дека покрај доживотниот затвор, за силувачите и педофилите треба да има и хемиска кастрација.

Силувањето се случило на 30-ти јануари годинава, кога 13-годишното девојче се шетало со нејзиниот 17-годишен дечко.

Тие биле нападнати во парк во Сицилија од седум млади Египќани на возраст од 15 до 19 години.

Напаѓачите ги одвеле во јавен тоалет каде што го силувале девојчето, а го натерале нејзиниот дечко да сведочи. Според изјавата на девојчето, таа била нападната од двајца, додека останатите гледале и го држеле нејзиниот дечко.

Откако успеале да побегнат, двајцата веднаш пријавиле во полиција и напаѓачите биле фатени во рок од 24 часа.

Според италијанскиот медиум La Republica, силувачите дошле во Италија на нелегален начин помеѓу 2021 и 2023 година (или 2022-ра според други медиуми).

Девојчето успеало да идентификува двајца од напаѓачите, а нејзиниот дечко останатите петмина. И ДНК анализата ги поврзала двајцата силувачи со нападот, пренесува италијанскиот медиум Corriere.

Наводно, најстариот напаѓач заедно со уште еден помагале во истрагата и тврделе дека тие не го силувале девојчето.

Четворицата полнолетни напаѓачи биле во притвор, додека тројцата малолетни биле задржани во центар за мигранти.

Едниот од малолетните напаѓачи сакал да избега, но бил фатен кога пробал да земе облека од неговиот дом.

Случајот предизвик лавина реакции во јавноста и многумина бараат построги казни за сексуалните престапници, но и построги мерки за оние кои влегуваат и престојуваат во земјата нелегално.

Спирова С. | Црнобело