„Среќа што кралицата нема да види дека Меган го уништува кралското семејство“ – критики за документарниот филм на Хари и Меган

Детали

петок, 02 декември 2022

„Бесрамно глумат жртви“, „Сакаат да ги уништат Вилијам и Кејт“, „Наликуваат на Кардашијанс“ – со овие зборови поддржувачите на британското кралско семејство го оцрнуваат излегувањето на новиот документарен филм на Хари и Меган. За што ќе се зборува во филмот и какви се досегашните реакции?

Се очекува новиот документарен филм за принцот Хари и Меган Маркл да го следи периодот додека тие сѐ уште беа во врска и почетокот на нивниот брак, а целта им е да покажат зошто морале да донесат одлука за да си заминат од кралското семејство.

„Морав да направам сѐ за да го заштитам сопственото семејство“ – вели Хари во трејлерот за филмот.

Точно 3 месеци по смртта на кралицата Елизабета, Netflix ја најави премиерата на најновиот документарен филм Harry and Meghan, што на платформата ќе почне да се емитува на 8-ми декември годинава.

Откако за време на погребот на Елизабета, Хари и Меган покажаа обединетост со Вилијам и Кејт и се појавија заедно, многумина очекуваа дека конечно двата пара ќе се обидат да ги смират односите, но очигледно по новиот документарен филм, тоа нема да се случи.

Трејлерот за филмот масовно се споделува на социјалните мрежи, а додека некои веќе коментираат дека е убаво што Хари и Меган конечно имаат можност да говорат отворено за сѐ што им се случувало зад затворени врати, други пак, сметаат дека ова е „бесрамен обид“ за да ги уништат Вилијам и Кејт и да го посрамотат кралското семејство.

„Токму на време Хари и Меган го објавија трејлерот за нивната сага во која глумат жртви на Netflix. Бесрамно.

Меган веќе ги уништи членовите на семејството Маркл, сега Хари сака да ја уништи династијата Виндзор. Единствена добра работа е што кралицата нема да го види ова“ – стои во еден твит.

https://twitter.com/danwootton/status/1598290525265723393

Освен што се соочуваат со критики на социјалните мрежи, британските медиуми во оваа ПР војна (како што ја нарекуваат) застанаа цврсто на страната на кралското семејство, па така денес весникот Daily Mail објави повеќе колумни и статии во кои за Хари и Меган напиша дека се финансиски пресметани и дека целта им е да ја уништат моменталната посета на Вилијам и Кејт во Бостон.

Според авторката Ребека Инглиш, објавувањето на трејлерот за време на посетата на Вилијам и Кејт на САД е објава за војна.

„Претставниците на кралското семејство беа згрозени и лути вчера кога трејлерот беше објавен на социјалните медиуми пред документарниот филм да биде прикажан на Netflix следната недела како дел од мултимилионскиот договор на Хари и Меган со стриминг платформата.

Исто така беа разочарани затоа што објавувањето е во ист период додека Кејт и Вилијам се во САД, што воедно е нивна прва посета на земјата по 2014-та година“ – стои во текстот.

Според авторката, Хари и Меган сакаат да станат следните Кардашијанс, а сконцентрирани се само на тоа да заработат што е можно повеќе пари.

Какви вистини ќе соопштат Хари и Меган во филмот останува да видиме, но ако се земе предвид нивното „бомбастично“ интервју кај Опра од пред две години, тогаш сигурно може да очекуваме нови скандали и детали што ќе покажат една друга страна на омиленото кралско семејство во светот.

Прочитајте и Пред Меган, таа беше „војвотка на скандалите“ во кралското семејство – Што знаеме за Сара Фергусон, сопругата на принцот Ендрју?

Б. С. Б. | Црнобело