Опра низ солзи зборува за мајка ѝ што ја избркала од дома кога останала бремена: „Не можам да кажам ништо убаво за неа“

Детали

среда, 12 февруари 2025

„Знам дека го правела тоа што знаела, но тоа не било доволно да бидам нахранета или да се чувствувам ценето. Па, престанав да се надевам дека ќе видам нешто друго од неа“, Опра Винфри со насолзени очи зборува за мајка си во нејзиниот подкаст.

Опра Винфри, која е можеби најбогатата и најуспешната водителка на светот, има живот исполнет со предизвици.

Едно од најпроблематичните нешта во животот на водителката е односот со нејзината покојна мајка – нешто за коешто Опра неколкупати има зборувано.

Неодамна, 71-годишната водителка повторно прозборе за мајка ѝ и тешкиот однос што го имала со неа.

Во разговор со психијатар кој беше гостин во нејзиниот подкаст, Опра изјави дека ѝ е тешко да најде добар збор за мајка си.

„Еднаш ме повикаа во црква да одржам говор за мајка ми. И, не можев да се сетам на ниту едно убаво нешто да кажам за неа“, зборува Опра додека пробува да ги задржи солзите.

Таа додава и дека постои само едно добро нешто што мајка ѝ го направила за неа:

„Не ме абортирала. Го правела она што знаела. Но, тоа што го знаела не беше доволно да ме нахрани или да направи да се чувствувам исполнето.

Не беше доволно да се чувствувам ценето, видено или дека сум ѝ важна. Не беше доволно.

Но, тоа беше најдоброто што можеше да го направи и јас престанав да се надевам дека ќе видам нешто друго“, раскажува Опра додека плаче.

Во коментарите на видеото, многу фанови покажуваат сочувство.

„Поминале децении, Опра заработила милијарди, а уште плаче кога зборува за мајка ѝ.

Родителите треба да разберат дека она што го прават и што им го кажуваат на децата, останува со нив засекогаш“.

Мајка ѝ на Опра – Верита Ли – почина во 2018-та на 83-годишна возраст.

Кратко по нејзината смрт, Опра зборуваше за последните мигови со мајка ѝ, истакнувајќи колку ѝ било тешко да се збогува со неа.

„Во болничкиот дом каде што беше мајка ми имаа мала книга за разговори.

Тогаш си помислив – зарем не е чудно? Јас сум Опра Винфри, а читам книга за што да ѝ кажам на мајка ми која умира.

На крај, ѝ реков ти благодарам. Ти благодарам бидејќи знам дека ти беше тешко да родиш дете како млада девојка.

Немаш образование. Немаш вештини. Имаш 17 години и бремена си. Многу луѓе би го дале бебето на посвојување. Многу луѓе би ти рекле да го абортираш.

Ти не го направи тоа. Знам дека беше тешко. Сакам да знаеш дека без разлика на сè, секогаш го даваше најдоброто од себе. И, гледај во каква личност се претворив јас“.

Целиот живот, мајка ѝ Верита работела како куќна помошничка.

Го запознала татко ѝ на Опра, Вернон, на 17-годишна возраст и по една ноќ со него забременила.

Ја родила Опра во 1954-та, но веднаш ја испратила кај мајка ѝ (бабата на Опра) за таа да се грижи за неа.

На 6-годишна возраст, ја изгубила баба ѝ откако починала, па Опра повторно се вратила кај мајка си.

Додека живеела овде, Опра ја доживеала најголемата траума од својот живот – била силувана од нејзин братучед.

Не е познат идентитетот на напаѓачот, но Опра има откриено дека нападите траеле подолг период, од нејзина 9-та, до нејзина 14-та година.

Мајка ѝ веројатно не била свесна за ова, но тоа што не успеала да ја заштити ќерка си сигурно имало влијание врз нивниот однос.

Како тинејџерка, поради траумите, Опра станала побунтовна и честопати бегала од дома, и на 14 години останала бремена. Па, мајка ѝ ја избркала од дома, односно ја испратила кај татко ѝ.

„Бегав од дома и скришно носев дечковци во мојата соба. На 14 години, мајка ми ме испрати кај татко ми“.

Опра го родила детето, но тоа починало само неколку недели подоцна.

Низ годините, Опра и мајка ѝ колку-толку го подобрија односот.

Опра ѝ помагаше финансиски и ѝ овозможи удобен живот во последните години.

Погледнете и: Била силувана на 9 години, свршена е со партнерот 25 години: Факти за Опра Винфри

Спирова С. | Црнобело