„Прашалникот е половина срце“ + уште 2 нови книги кои ќе ве освојат од првата до последната страница

„Ако читате само книги што сите други ги читаат, ќе го мислите само она што сите други го мислат.“ Доколку сè уште не можете да најдете време за читање, макар и само 10 страници дневно, навистина многу губите во животот.

Особено кога станува збор за овие нови, интересни наслови, кои ќе ви го освојат вниманието од првата до последната страница:

Прашалникот е половина срце – Софија Лундберј

Елин Боулс има совршен живот. Таа е една од најуспешните фотографки во Њујорк, мажена за прекрасниот Сем, со кого ја има 17-годишната ќерка Алис. Сепак, оваа слика е само фасада.

Еден ден Елин добива писмо од Готланд, мал остров во близина на Шведска, каде што го има поминато своето сиромашно детство. Писмото е глас од минатото, кое Елин со сите сили се труди да го заборави бидејќи носи мрачни тајни што своевремено ја натерале да се отсели од родниот крај.

Сестрите од Версај – Сали Кристи

Низ дворските кулоари кружат приказни дека на младиот крал Луј XV по 7 години брак му здодеала неговата сопруга. Сега сите дворјани се трудат да му пронајдат соодветна љубовница на кралот.

Семејството Нел надалеку е познато по убавината на петте сестри, а четири од нив ќе се најдат во кралската прегратка. Во годините што следат, слатката и наивна Луиз, амбициозната Полин, волшебната Дајан и проникливата Мери Ен ќе се соочат со многу страдања, завери и интриги за да се изборат за својата љубов и моќта што ја посакуваат.

А петтата? Петтата сестра сум јас…

Некој друг живот – Јелена Бачиќ Алимпиќ

Близначките Ирене и Марта ван дер Линден безгрижно ги минуваат детството и младоста во живописното гратче Харлем на досег на Амстердам. По изгледот речиси идентични, по карактерот непомирливо различни, нераскинливо се поврзани една со друга.

Но, нивниот татко, ценет доктор, чува тајна која може да ја уништи семејната среќа… Сето ова еден ден ќе биде минато.

(О)Милена | Црнобело