Дали сте подготвени да ја разбудите креативноста со првата боенка за возрасни?

Уметноста честопати знае да ги поврзе нештата на најразлични начини во креации кои го задржуваат нашето внимание.

Поврзувајќи ја боенката како една од омилените книги на децата, уметноста, креативноста и движечките светски трендови, младата креаторка на ова прекрасно дело за еден поинаков ден од вашето секојдневие, Ивана Горичан, ја создава оваа боенка за возрасни наменета за едно посебно доживување.

Горичан, инаку позната по својата работа на еден посебен вид уметност наречена „doodle art”, која ја развива настрана од факултетските активности вели дека идејата за ваква креација доаѓа од желбата да и другите на некој начин ја почувствуваат нејзината работа, која бара огромна концентрација, трпение и секако огромен талент.

Низ страниците на оваа боенка за креативен ден можете да најдете илустрации на кои токму вие треба да им дадете живот по ваша замисла.

Ќе имате можност да ја разбудите вашата креативност, која заради секојдневните обврски се повеќе и повеќе ја потиснувате и за момент да се присетите како сето тоа изгледаше во деновите додека бевте деца.

Целта на оваа боенка е да се создаде автентично дело, бидејќи секоја индивидуа има различна замисла и различна реализација која може да ја примени на дадената илустрација.

Боенката е поделена на неколку дела и на неколку нивоа на сложеност, изобилува со илустрации со животни, геометриски облици, мотиви од природата и многу бесконечни илустрации кои имаат за цел да смируваат, опуштаат и да внесат хармонија во размислувањето на оној кој се решил да го создаде своето креативно дело.

Исто така содржи креативни мисли и цитати од познати автори кои го водат уметникот низ секое дело, а позитивната страна е што откако ќе го завршите вашето дело можете да го урамите и да биде еден прекрасен орнамент на некој од вашите ѕидови.

Оваа боенка е прва од овој тип, посебна е затоа што е од македонски автор, а ги следи светските трендови.

Можете да ја најдете на Саемот на книгата на штандовите на книжарница „Три".

Главната порака која ја носи ова дело е дека уметноста лежи во секој од нас, се она што треба да направиме е да ја истражиме и да дозволиме нашиот креативен ум да си поигра со боите и формите за да го исполниме денот со светлина која ќе ни донесе трошка среќа.

Н. Буџак | Црнобело