Пере од Нокаут: „Бидете луѓе, затоа што ако го прокоцкаме и тоа... Нема ни што да се свири веќе“

Детали

петок, 21 март 2025

„Луѓето знаат да гледаат директно во туѓата несреќа. Да се насладуваат на туѓиот пекол... Но, знаеш што не знаат? Да молчат кога е потребно. Да ја спуштат главата кога не знаат. Бидете луѓе, затоа што ако го прокоцкаме и тоа... Нема ни што да се свири веќе“, вели Никола Перевски - Пере.

Никола Перевски Пере од Нокаут на својот Инстаграм профил напиша неколку стихови со наслов „Ќути кога боли“, инспириран од ситуацијата со пожарот во Кочани, но и случувањата во деновите потоа.

Објавата на Пере гласи:

ЌУТИ КОГА БОЛИ

Луѓето знаат да гледаат.
Знаат да гледаат директно
во туѓата несреќа.

Да кликнат,
да коментираат.

Да се насладуваат на туѓиот пекол
додека грицкаат нешто мрсно од кеса.

Но, знаеш што не знаат?

Да молчат кога е потребно.
Да ја спуштат главата кога не знаат,
кога немаат поим.

Да се ​​тргнат настрана кога болката не е нивна.
Да ги остават луѓето да ги закопаат своите деца
без блиц, шепоти и евтини анализи.

Не барам чуда.
Не барам свет
без врева.

Барем за тие неколку дена,
Бидете луѓе.
Не таблоиди.
Не ловци на туѓа трагедија.
Не доктори за се и сешто.

Само луѓе.
Со душа, ако ни остана.

Затоа што ако го прокоцкаме и тоа -
Нема ни што да се свири веќе.

Никола Перевски

С. С. | Црнобело