Македонка за нејзиното ‘виножито бебе': „По спонтан абортус или мртвороденче, забременувањето е исцрпувачко“

Детали

вторник, 18 февруари 2025

„Од моментот кога дознав дека сум повторно бремена, бев преплавена од страв. Не можев да си дозволам да изгубам уште едно бебе. Направив сè што беше во моја моќ за да избегнам уште еден спонтан абортус, но дојде нова дијагноза...“, гласи дел од емотивната исповед на Ирена Србиновска.

Во 2020 година, Македонката Ирена Србиновска победи во австралиското реално шоу The Bachelor и го освои ергенот Локи Гилберт.

Парот во февруари 2024-та доби ќерка, а сега, една седмица пред првиот роденден на нивната наследничка, Ирена искрено проговори дека таа е „виножито бебе“ и какви тешки мигови и дилеми имала за време на бременоста со неа.

Инаку, „Бебе виножито“ е бебе родено по спонтан абортус, по раѓање мртво дете или по смрт на новороденче (од 0 до 27 дена). Се вика „бебе виножито“ затоа што е како виножито што се појавува по бура.

Објавата на Ирена гласи:

„Темната страна на „виножито бебе“

Ова време минатата година влегував во 38-та недела од бременоста, а мојата анксиозност беше на највисоко ниво. Никој не те подготвува како ќе се чувствуваш или како да се справиш со бременоста, особено по загуба на бебе/бебиња.

Без разлика дали е спонтан абортус или мртвородено дете, забременувањето по загуба е емоционално исцрпувачко, а јас се чувствував како да немам право да се чувствувам така, бидејќи имав „среќа“ што можев повторно да забременам.

Забременив со Ава веднаш во наредниот циклус по уште еден спонтан абортус. Оваа бременост беше планирана и бев толку возбудена. Немав време да заздравам, иако мислам дека ниту едно време не може целосно да ја залечи таа болка.

Од моментот кога дознав дека сум повторно бремена, бев преплавена од страв. Не можев да си дозволам да изгубам уште едно бебе.

Направив сè што беше во моја моќ за да избегнам уште еден спонтан абортус.

И токму кога стигнав до „безбедната зона“ од 20 недели, моето бебе беше дијагностицирано со SUA (една папочна артерија). Од лично искуство, не го пребарувајте ова на интернет – разговарајте со медицински професионалец.

Мојата „безбедна зона“ на 20 недели стана почеток на внатрешна тортура и стрес во втората половина од бременоста. Продолжив да се грижам толку многу, што бев индуцирана на 38+6 недели. Единственото нешто што ме смири по 9 месеци беше моментот кога ја држев мојата ќерка во прегратка.

Продолжува на следната страница...