Лица со попреченост беа ѕвезди на ревија во Струмица: „Нивната среќа не се опишува, оваа година имавме 23 пара модели“

Детали

понеделник, 16 декември 2024

23 лица со попреченост и 150 дечиња со типичен раст од градинките во Струмица, беа ѕвезди на осмата хуманитарната ревија „Убави сме, свои сме“.

Во организација на Здружението за поддршка и помош на лица со даунов синдром „Вера“, на 14 декември во Струмица се одржа настанот „Убави сме, свои сме“.

Ова е хуманитарна модна ревија на која како модели се појавуваат лица со попреченост, а во придружба на познати јавни личности.

Ова беше 8-мо издание на хуманитарниот моден настан, кој е еден од најзначајните во Струмица во изминативе години.

Анче Туфекчиева, која е мајка на 17-годишната Верче, девојка со Даунов синдром, но и претседател на здружението „Вера“, своите впечатоци ги сподели за CRNOBELO.com.

По успешната ревија, која предизвика бура на позитивни реакции во јавноста, а на која еден од моделите беше и нејзината ќерка Верче, ни кажа:

„Ревијата на лица со попреченост, насловена ‘Убави сме, свои сме’, се одржа во преполна сала во Центарот за култура ‘Антон Панов’.

Ова е хуманитарна модна ревија на која лица со попреченост се облечени во модели на познати модни брендови од цела држава, а се придружувани со познати јавни личности од државата - пејачи, политичари, доктори, наставници, инфлуенсери, фитнес тренери и слично.

Оваа година имавме 23 пара на манекени кои дефилираа на вистинска модна писта, како и 150 деца со типичен развој од градинките и училиштата од Струмица, кои со свои точки ја збогатија нашата ревија.

Тука беа и одбојкарки од Ново Село, кои излегоа во придружба на децата од посебното основно училиште ‘Климент Охридски’ од Ново Село.

Сите тие беа многу убави и возбудени околу својот настап.

Луѓето често знаат да ме прашаат ‘До кога ќе ја организираш ревијата?!’.

Можам слободно да кажам дека кога нешто се организира со љубов, а не на сила, изгледа баш како нашата ревија - полна со емоции и љубов.

И најважно од сè ја испраќа пораката дека сите сме еднакви во ова општество и затоа мислам дека ревијата ‘Убави сме, сме свои’ сме ќе добие знак на бесконечност и секоја година ќе се организира.

Дополнителна мотивација ми е што децата и лицата со попреченост на овој настан се во главна улога и се многу среќни и задоволни, а публиката цело време аплаудира и ги поддржува.

Настанот е полн со емоции, нешто што не се опишува со зборови, туку треба да се доживее.

Им благодарам на сите учесници, на нивните родители, а најмногу ѝ благодарам на моја Верче која секојдневно ни покажува дека најбитно во животот е да бидеш човек, дека љубовта и почитта  се пред материјалното“.

Прочитајте и Анче од Струмица за ќерката Верче (17) со Даунов синдром: „Господ ми ја прати – кога би можеле пак би се избрале една со друга“

Повеќе фотографии од ревијата „Убави сме, свои сме“:

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело / фото: Роберт Ѓорѓиев