Синот на Тома Здравковиќ: „Наместо во парк ме носеше во казино – можеа да го спасат, но тој не сакаше“

Детали

вторник, 04 јануари 2022

Ќерката Жаклина воопшто не ја видел од нејзини 5 до 17 години, а синот Александар вели дека бил многу млад кога го загубил таткото, но, додека растел со него, му се случувало наместо во парк да заврши во казино или кафеана. Што велат децата на Тома Здравковиќ за него?

Фото: Facebook/ Александар Здравковиќ/Жаклина Здравковиќ

Биографскиот филм за Тома Здравковиќ викендов се емитуваше на програмата на МРТ, но и на РТС, така што голем дел од балканската публика за време на новогодишните празници имаа можност да се присетат на песните на познатиот пејач, но и да дознаат повеќе биографски факти за него.

Од филмот „Тома“ се добива впечаток дека познатиот пејач имал само едно дете, но тоа не е точно, тој имал две деца: ќерка и син.

Од првиот брак со сопругата Олгица со која бил само неколку месеци во брак во 1963-та година ја има ќерката Жаклина, a од бракот со четвртата сопруга Гордана, го има синот Александар.

Фото: Facebook/Жаклина Здравковиќ

По повод 30-годишнината од смртта на Тома Здравковиќ непосредно по премиерата на филмот „Тома“, неговиот вечен дом во Централните гробишта во Белград го посетија и последната сопруга Гордана, но и ќерката Жаклина која тогаш изјави дека нејзиниот татко постојано сакал да ѝ надомести за изгубеното време.

„Го помнам како прекрасна личност, романтичен, тврдоглав, емотивен! Кога сакаше да успее во нешто немаше можност некој да го запре“ – вели таа.

Жаклина вели дека таа израснала во Пула, а тој ја гледал кога доаѓал на концерти. Жаклина појаснува дека во периодот од 5 до 17-годишна возраст воопшто не го видела татко ѝ.

Кога наполнила 18 години самата посакала да го види татко ѝ, по што дошла кај него и останала.

Жаклина денес живее во Холандија, има две деца, а во Србија се враќа многу ретко.

Синот Александар, кој денес живее со мајка му Гордана во Торонто, не се појави по повод премиерата на филмот, но тој во минатото говореше за неговиот татко и за сеќавањата.

Фото: Facebook/ Александар Здравковиќ

Александар, за првпат го посети гробот на неговиот татко во 2016-та година или 25 години по смртта на славниот пејач. Тој тогаш рече дека знаел дека неговиот татко бил мошне болен, но дека сепак бил во шок кога починал.

„На првата операција што ја имаше му извадија бубрег. Јас подоцна дознав дека можеби можеле да го спасат. Но, не го направиле тоа, па неговиот рак на простата метастазирал на вториот бубрег и потоа му остана само дијализата.

Искрено, не верувам дека тој сакаше да живее така, да остане без бубрези и да го водат на дијализа. Тој не беше таков, сакаше да ужива во животот“ – рече Александар.

Фото: Facebook/ Александар Здравковиќ

Синот на Тома, признава дека во периодот кога останал без него воопшто и не сфаќал колку неговиот татко бил популарен. Како што вели, Тома дома секогаш бил обичен човек.

„Кога ќе дознаат чиј син сум прво ме прашуваат како растев без него. Некогаш се претставував како Александар Саша за да го избегнам товарот на презимето Здравковиќ.

Бев многу млад кога тој почина, дури подоцна сфатив колку многу тој значи за музиката и за другите луѓе и што остави зад себеси.

Фото: Facebook/ Александар Здравковиќ

Дури кога наполнив 16-17 години, кога почнав да се вљубувам, почнав да ги сфаќам неговите песни. Наместо во парк некогаш со него одев во казино. Видов многу работи многу млад. Не ни знаев што се случува околу мене“ – рече тој во една прилика.

Александар завршил филмска школа во Торонто, а работи како тон-мајстор на концерти, но има и свое музичко студио.

Освен што соработува со познати канадски музичари, вели дека креира и сопствена музика, но неговите песни да бидат прифатени само доколку се доволно добри, а не затоа што е син на познатиот српски пејач.

Прочитајте и Најтажната сцена на која сите плачат во „Тома“ е измислена и уште 5 невистини прикажани во филмот

Б. С. Б. | Црнобело