Соња од Црна Гора забременила на 57 години со ин-витро направено во Скопје: „Две децении го чекавме овој момент“

Детали

понеделник, 17 февруари 2025

Соња од Црна Гора останала бремена со асистирано оплодување на 57-годишна возраст. Со сопругот Марко ја направиле процедурата во клиника во Скопје, откако две децении безуспешно се обидувале да добијат дете.

Соња Миротиќ и нејзиниот сопруг Марко 22 години се обидувале да добијат дете. Дури сега, на 57-годишна возраст, Соња останала бремена.

Соња и 69-годишниот Марко од Црна Гора се во брак веќе 23 години, а велат и покрај препреките, решиле да не се откажат од желбата за потомство.

Сега, пак, ја споделуваат нивната приказна со желба да им дадат надеж на другите парови кои се соочени со истите предизвици.

„Им порачувам на сите парови кои минуваат низ истото како и ние да веруваат. Прво да веруваат во себе и својот партнер и да имаат голема желба за дете.

Може да помислат дека треба да се откажат, тоа е нормално, тоа е психа, но и удар по џебот. Само нека бидат упорни и веројатно желбата ќе им се оствари.

Кој верува во чуда, тој создава чуда“, порачува Соња во емисија за порталот Dan.

Низ годините, Соња и Марко посетиле безброј лекари со надеж дека некој ќе им помогне.

Се обидувале и со асистирано оплодување, но возраста на Соња почнала да претставува пречка.

„Сè беше безуспешно. Во еден миг и целосно се откажавме. Меѓутоа, наша блиска пријателка повторно нè охрабри. Беше упорна и сосема случајно дознавме за докторката Ана Јеремиќ.

Додека бевме кај неа, нејзините колеги се јавија во неколку клиники, но сите им кажаа дека има лимит за жени, дека интервенцијата за асистирано оплодување ја прават на жени до 54-годишна возраст. А, јас само што наполнив 56“.

Но, докторката сакала да им ја исполни желба, па ги информирала за клиника во Скопје.

„Таму ни кажаа дека нема ограничување на возраста, па отидовме на преглед на 1-ви април. Лекарите беа задоволни со наодите.

Трансферот беше направен на 26-ти јули. Беа оплодени пет ембриони – ми вбризгаа два, и еден се задржа, па сега имам уште три“.

Соња додава и дека биле најстариот пар кој се лекувал на клиниката.

„Сите ни даваа надеж дека овој пат конечно ќе успееме. Бевме најстариот пар од Црна Гора, а доаѓаат и млади луѓе, од 19, 20 години.

Иако ниеден доктор не може да гарантира дека ќе добиете потомство, сепак треба да веруваме“.

Терминот за породувањето на Соња е околу Велигден.

Бременоста на Соња ја следи гинеколог од Црна Гора – Вања Милошевиќ.

Тој вели дека иако ваквите ситуации се реткост, сепак се доказ дека некогаш не треба да се губи надеж.

„Случајот на Соња покажува дека медицината може да им пркоси на границите.

Медицинскиот напредок ни покажува дека можноста за бременост е реална дури и надвор од поставените граници на клиниките“, вели тој за телевизијата Prva TV.

Тој истакнува дека бременоста на оваа возраст може да биде ризична, но со помош и поддршка од професионалци, бременоста може да помине и добро.

„Секако дека има ризик на возраст над 40-45 години, но ризиците се дел од животот.

Како искусни професионалци, ние треба да им бидеме потпора и ветар во грб на жените кои сакаат да станат мајки“.

Спирова С. | Црнобело

фото: Јутјуб скриншот