Моќна порака од хрватски психотерапевт: „Не е важно само жената да биде добра мајка, туку пред сè да биде психички добро“
- Детали
- среда, 14 јуни 2023
„Не е важно што прави мајката, туку каква е состојбата на нејзиниот нервен систем, како таа се чувствува во себе. Ако таа е смирена, и бебето ќе биде мирно. Ако таа е во лоша состојба, кој ќе го смири тоа бебе?“, вели хрватскиот психотерапевт Томислав Куљиш за важноста на менталното здравје на мајката и испраќа моќна порака.
Томислав Куљиш од Хрватска е психотерапевт, автор и предавач. Тој се фокусира на менталното здравје на родителите, а има основано и центар со програма за родителство и правилен ментален развој на деца.
Во поткаст на српскиот магазин Zadovoljna, Томислав истакнува колку е важна психичката состојба на мајката и зошто не треба да се запоставува.
Според терапевтот, само кога мајката се чувствува добро, ќе може да се грижи за своето дете. Тој вели и дека улогата на таткото е да ѝ помогне во тоа.
Дел од советите на Томислав:
„Во родителството не е важно мајката да биде добра мајка, туку мајката таа да е добрo (да се чувствува добро психички). И, ако мајката е добрo, тогаш би требало и сè друго да биде добро.
Исто како кога ќе посадите растение во почва... Ако почвата е добра, и растението ќе биде добро. Ако е камен, залудно ќе правите што било со растението. Мајката, на некој начин, е почва за детето. Мора да биде топла и плодна.
И, ако сè е во ред со мајката, тогаш можеме да го направиме најдоброто за детето. Улогата на таткото е да ѝ помогне на мајката да биде добра.
Меѓутоа, со сето ова што го кажав, свесен сум дека се создава притисок врз мајката. Нормално дека нема да биде добра – и породување, и девет месеци кои можеби биле тешка бременост. И можеби депресија, и детето не спие, веќе со месеци не заспива нормално…
Ова е период со многу предизвици за мајката. И, секогаш пробувам да нагласам – мајките се како маските со кислород во авион. Мора да се погрижам прво јас да бидам добро, и тоа е првиот чекор. Па, макар и на извесен период да се оттргнам од детето, само за да дојдам на себе.
Ако мајката е добро, детето покрај неа ќе се смири, детето покрај неа ќе заспие и ќе спие и нема да плаче.
Често имам ситуации каде што мајката се жали, а детето плаче цело време, а тоа трае со месеци. И, ја прашувам: „Како си ти?“, ми вели: „Јас сум веќе луда“.
Нејзиниот систем е растреперен.
Само замислете вие, како возрасна личност, да сте цела вечер со некој во ваква состојба, цела ноќ да лежите покрај личност која трепери. Па, нема да можете да бидете добри.
А, детето е систем кој нема никакво саморегулирање или е минимално. Детето мора да се регулира преку организмот на мајката.
Овде не е важно што прави мајката, туку каква е состојбата на нејзиниот нервен систем, како таа се чувствува во себе.
Кога мајката е смирена, бебето ќе биде мирно. Кога мајката е во лоша состојба, кој ќе го смири тоа бебе?“
Спирова С. | Црнобело
Би можело да ве интересира:
Препорачуваме
Најчитани неделава
