Сузана Гавазова за родната Сушица: „До 30 години живеев во селото со моите родители, се гордеам што сум родена таму“

Детали

сабота, 15 јуни 2024

„Јас бев срамежлива девојка, но имав голема поддршка од моите соселани кои силно ме бодреа, па така станав пејачка. Затоа сакам и денес да ги направам горди сушичани, да се фалат и гордеат со мене“, открива фолк-пејачката Сузана Гавазова во серијалот „За мојот роден крај“ за CRNOBELO.com.

Фолк-пејачката Сузана Гавазова е една од најпознатите струмичанки кај нас. Но, таа вели дека иако денес живее во Струмица, сепак до својата 30-та година живеела во селото Сушица, со своите родители.

Па и денес кога ќе ја прашаат за нејзиното родно место, таа со многу љубов и гордост раскажува за ова струмичко село.

Во разговор за CRNOBELO.com, Сузана ни раскажа неколку интересни работи за себе и за селото од каде што потекнува:

„Родена сум во селото Ново село, струмичко. На 21.12.1979 пред 44 години се слушна мојот глас во болницата во Ново село и сите уште тогаш рекле ‘оваа ќе биде пејачка’.

Цела болница ечела и само јас сум плачела нонстоп.

Уште како бебе сум била борбена и неуморна!

До 30 години живеев со моите родители во село Сушица, па и ден денес кога ќе ме праша некој од каде сум, им одговарам дека сум од село Сушица.

За мене моето родно село е посебно затоа што таму израснав, таму ги стекнав моите први другарки и другари, таму се случија првите симпатии, моите први љубовни рани, ама и првиот настап пред публика, на кој добив громогласен, силен и искрен аплауз.

 Селото Сушица беше едно сложно село за кој важеше фразата „Еден за сите, сите за еден“.

Јас бев срамежлива девојка, но имав голема поддршка од моите соселани кои силно ме бодреа, па така станав пејачка, а за нив и ден денес пеам и творам.

Сакам и денес да ги направам горди сушичани, и нормално, да се фалат и гордеат со мене.

Од селото Сушица имаат излезено многу талентирани луѓе - успешни каскадери, глумци, успешни фудбалери, писатели, доктори, фотографи, уметници, музичари, пејачи.

Толку талентирани и добри луѓе на едно место, на кои сум и јас горда, а и горда што сум од Сушица.

Селото има историја, има посебен дух и секогаш кога одам таму се полнам со енергија, со сила и моќ.

Повеќе фотографии од Сузана и селото Сушица на следната страница...