Дизајнерката Коцарева ни открива детали за венчаниците на Александра Шијакоска: „Таа сакаше цвет и ракавици, идејата за коктел фустанот е моја“

Детали

недела, 23 јули 2023

„Александра ме праша дали е подобро да има ракавици или само еден ракав од страната на цветот. Дефинитивно бев за ракавици со цел да дадат поголема префинетост на самата венчаница“, открива за CRNOBELO.com дизајнерката Моника Коцарева, која ги креираше двата свадбени фустани за нашата инфлуенсерка Александра Шијакоска.

Модната дизајнерка Моника Коцарева, која е долгогодишна соработничка, но и блиска пријателка на нашата инфлеунсерка Александра Шијакоска, ѝ ги креираше двата фустана за свадбата што се одржа на 19-ти јули. Едниот фустан е елегантен, со впечатлив цвет и ракавици, а вториот е краток и со реси од монистра.

Александра и во двете креации изгледаше префинето и блескаше покрај својот сопруг Едмонд Весели кој, пак, славеше и роденден.

Моника Коцарева

Венчаниците на Шијакоска привлекоа големо внимание во јавноста, а дизјанерката Коцарева за CRNOBELO.com откри детали за нивната изработка и соработката со Александра:

Од поодамна соработувате со Александра Шијакоска. Дали поради тоа ви беше полесно да ја креирате венчаницата за неа, или кога правите креација за некој близок, предизвикот, но и личната одговорност се поголеми?

Александра е една прекрасна личност со која соработувам уште од 2018-та година.

Ги знам совршено нејзините пропорции, па многу често се случува да нема ни потреба да доаѓа за проби. 

Конкретно за венчаницата имавме само една проба и сè беше перфектно.

Предизвикот и одговорноста се секогаш големи кога знаеш дека работиш за некој што има многу голем број на следбеници, па креацијата ќе биде забележана и критикувана од многу луѓе.

Колкава слобода имавте кога го правевте фустанот или Александра конкретно ви кажа што сака?

Креацијата ја договоривме во една реченица. Ми кажа што сака отприлика и ми остави одврзани раце.

Од толку скромна личност не можеш да очекуваш да има големи барања.

Целиот процес го остави на мене, да одлучам од тоа од каков материјал ќе биде, па до завршното „копчање“.

Дојде само кога беше готов фустанот и беше презадоволна, знаејќи дека се впушти во сигурни раце.

Чија идеја беше големиот цвет на фустанот со едноставен, елегантен и многу впечатлив крој?

Идејата за цветот беше на Александра.

А формата и големината ги одлучив јас за да биде во склад со нејзините пропорции.

Дали таа сакаше да носи ракавици или вие ѝ предложивте да ги проба за да го заокружат целиот изглед?

Ме праша што мислам дали е подобро да има ракавици или само еден ракав од страната на цветот.

Дефинитивно бев за ракавици со цел да дадат поголема префинетост на самата креација.

Од каков материјал е изработена венчаницата и колку време ви требаше да ја направите?

Употребивме парада жоржет за изработка на венчаницата, а ја сработивме за две недели.

За целиот изглед да биде заокружен, Александра носеше и голем шешир на фотосесијата, кој исто така го изработивме ние во „Ателје Коцарева“.

Вие го креиравте и вториот фустан што го носеше Александра... Тешко ли беше да најдете соодветен материјал или материјалот е доработен рачно?

Вториот фустан беше моја идеја, со што таa веднаш се согласи.

Луксузниот краток фустан беше составен од стотици реси, везани со илјадници ситни монистри, рачно работени.

Дали можеби ќе ѝ ја креирате и венчаницата за свадбата в година?

Секако! Тоа ќе бидат неколку венчаници што ќе ги носи, но за тоа нема да ви откријам сè уште ништо.

Прочитајте и Александра Шијакоска се венча со саканиот по 12 години врска, на денот на неговиот роденден

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело / фото: Симона Калица