3 нови посни рецепти за Св. Никола + идеи како да ја поставите трпезата (фото+видео)

Ако славите Свети Никола, а сакате да промените нешто на трпезата, ви нудиме неколку нови предлог рецепти и идеи за сервирање на масата.

Празничниот период исполнет со слави е еден од најубавите, а Свети Никола е празникот кој се одбележува во многу домови, како слава или именден.

Посната трпеза надополнете ја со неколку нови, вкусни, посни рецепти, а масата декорирајте ја на уникатен начин.

Во продолжение посни рецепти + идеи за сервирање:

Предјадење – посна солена торта

Потребни состојки:

• 1 конзерва туна (180g)
• 150-200g маргарин
• 200g посен мајонез
• 1 лажица сенф
• 300g посни крекери
• 50g печен сусам
• 2 кисели краставици
• 2 варени моркови
• 2 варени компири
• 1 кисела пиперка
• 50g печени кикирики
• 200ml пресол од киселите краставички

Начин на подготовка:

Изматете го добро маргаринот, а потоа додадете мајонез и измешајте ја смесата. Краставичките, компирот, морковите и пиперката исечкајте ги на ситни коцки, па додадете го во нив изматениот маргарин со мајонезот, но оставете две лажички од смесата маргарин и мајонез за премачкување. Додадете лажичка сенф во филот и измешајте.

Во послужавник редете ги крекерите кои претходно ќе ги потопите малку во пресол. На наредените крекери намачкајте од филот и добро распоредете го, па врз него повторно ставете ред крекери па фил и така наизменично додека не се потроши материјалот.

Одозгора и од страните премачкајте со смесата од маргарин и мајоне. Наросете печен сусам и крупно сечкани кикирики. Тортата не се служи веднаш, оставете малку да се стврдне.

Главно јадење – посни ќофтиња од грав

Потребни состојки (количина по желба):

• Грав
• Масло
• Праз
• Сусам
• Сол и бибер

Начин на подготовка:

Сварениот грав исцедете го добро од вода и изгмечете го. Посолете го и почнете да правите топчиња во облик на ќофте.

Исечкајте го празот и пропржете го на масло, додадете бибер и наредете го по цела тава.

Одозгора наредете ги ќофтињата од грав, наросете со сусам по желба, поклопете ја тавата и печете.

Во текот на печењето контролирајте ги ќофтињата да не изгорат.

Десерт – посни руски капи

Потребни состојки:

За тесто:

• 200ml кисела вода
• 200g брашно
• 1 прашок за печиво
• 50ml масло
• 100g шеќер
• 2 лажици какао

За фил:

• 4 лажици млеко од соја во прав
• 500ml врела вода
• 100g шеќер
• 1 ванилин шеќер
• 3 лажици густин
• 3 лажици брашно
• 250g посен маргарин
• 3 лажици шеќер во прав
• 100g кокос

Глазура:

• 100g посно чоколадо
• 2 лажици масло или коцка маргарин

Начин на подготовка:

Во сад истурете 200g брашно и 1 прашок за печиво, додадете 100g шеќер, 50ml масло, какао и киселата вода. Измешајте ја добро смесата.

На плех обложен со хартија за печење истурете го тестото. Печете на 200˚С околу 20 минути. Префрлете го тестото на друга хартија, а претходната тргнете ја. Кога ќе се олади тестото, со калап извадете кругови.

Во тенџере со врела вода додадете 100g шеќер и 4 лажици млеко во прав, измешајте и додадете ванилин шеќер, па ставете на тивок оган. Во друг сад, измешајте 3 лажици брашно со 3 лажици густин во малку вода, а кога ќе проврие млекото, додадете ги густинот и брашното во тенџерето и изедначете ја смесата со жица за матење. Оставете целосно да се излади со почесто мешање.

Во друг сад, ставете го претходно омекнатиот маргарин и 3 лажици шеќер во прав. Кога кремот кој го подготвивте претходно ќе се олади, додадете го постепено во маргаринот и миксирајте додека смесата не стане пенлива и не се изедначи.

На еден од круговите тесто намачкајте малку од филот, па поклопете го со друг круг како сендвич и на крај целосно намачкајте го од страните колачот па извалкајте ги со кокос.

Стопете го чоколадото и врз секој колач ставете по една лажица. Оставете да се олади.

На следната страна има уште идеи за посни рецепти и поставување на масата...