3 посни предјадења од кои ќе излижете прсти

Кој вели дека посното не е вкусно? Изгледа дека одамна помина времето кога менито за посни јадења се сведуваше на леб и мармалад.

Денес имаме толку многу избор, што постот ќе ви помине брзо и лесно, а ќе имате и што вкусно да наместите на вашата трпеза за посните слави.

Следуваат 3 посни предјадења кои не само што се вкусни, туку и изгледаат неодоливо привлечно:

Посни ќофтенца од грав

Потребно ви е:

• Околу 350 g грав
• Масло за јадење
• Праз
• Сусам
• Сол и бибер

Како се подготвува?

Сварениот град добро се процедува од водата и зрната се згмечуваат со рака или виљушка (внимавајте само да не стане целосно пире).

Гравот се посолува и се обликуваат топчиња, односно мали ќофтенца.

Празот се сечка ситно и се пропржува на малку масло. Се додаваат зачини по вкус (сол, бибер, вегета, куркума) и се распоредува во тепсија.

Над празот се ставаат ќофтињата од грав. Се посипува сусам по желба. Се покрива со капак или фолија за печење и се пече во загреана рерна на 200 °С.

Внимавајте ќофтенцата да не ги изгорат, бидејќи времето на печење е релативно кратко, околу 20-25 минути, во зависност од јачината на рерната.

Посна паштета од ослич

Потребно ви е:

• 1 kg ослиќ риба
• 1 морков
• 4 поголеми компири
• 1 шолја масло
• Бибер
• Лорберов лист
• 1 лажица сенф
• Сок од лимон
• Магдонос
• Малку оцет
• Сол и вегета

Како се подготвува?

Осличот се чисто, се попрскува со малку оцет и се остава да отстои околу 30 минути.

Рибата повторно се мие со вода и се става во подлабок сад да се свари.

Се додаваат и компирите, морковот, лорберот, биберот и солта. Оставете сè добро да се свари.

Издвојте го само осличот од тенџерето, а останатиот дел од зеленчукот тргнете го настрана добро прецеден во чинија.

Осличот исчистете го од коските и спојте го со остатокот од зеленчукот, освен лорберовиот лист.

Додадете го сенфот и сокот од лимон.

Со миксер или рачен блендер, испасирајте ја смесата додавајќи малку по малку масло.

Сами ќе забележите колку масло е потребно според текстурата на намазот.

Додадете вегета согласно вкусот.

Посни пролетни ролнички

Потребно ви е:

• 1 пакување тенки кори за пита
• 100 g морков
• 100 g зелка
• 100 g целер
• Соја сос
• Сол и бибер
• Масло за јадење

Како се подготвува?

Зеленчукот исечкајте го по должина на тенки ленти или изрендајте го. Зачинете го со сол и бибер и посипете малку соја сос.

Секоја кора наполнете ја со зеленчукот и завиткајте мали ролни со димензии 5 × 1,5 cm.

Испржете ги на загреано масло додека не поруменат.

Послужете ги топли со посен мајонез по желба.

(О)Милена | Црнобело