Направете си сок од лубеница и лимон кој лесно може да се претвори во алкохолен коктел

Слично како шминката или облеката која со мали модификации може да се адаптира од дневна во ноќна, ова правило важи за повеќе работи во животот.

Една од нив се секако природните овошни напитоци кои може за 10 секунди да ги претворите во вкусен алкохолен коктел.

Но, да почнеме со безалкохолното – сок од лубеница и лимон.

Ќе се изненадите колку всушност лубеницата е подеднакво пријатна за консумирање и во течна форма. Со оглед на фактот што дури 92% од нејзиниот состав ѝ припаѓаат на водата, тоа ја прави одличен производ за во соковник.

За разлика од другите овошја со кои ќе се намачите, бидејќи ви е потребна поголема количина да добиете сок, со лубеницата го немате тој проблем.

Само една голема резанка како на фотката ќе ви даде 500 ml свеж сок.

На ова додадете 1-2 поголеми лимони, во зависност од тоа колку киселкаст го сакате сокот, и неколку коцки мраз, а можете да го зачините и со свежи ливчиња нане за уште поголемо освежување.

За алкохолната варијанта едноставно додадете вотка – онолку колку што сакате да ви биде јак коктелот.

Доколку се прашувате зошто би пиеле сок од лубеница, позитивните причини се многубројни:

Богата со ликопен и витамин Ц

Дали сте знаеле дека во лубеницата има повеќе ликопен отколку во доматите? Тој ја создава онаа розовоцрвеникава боја во производите, а се грижи за срцето, односно спречува кардиоваскуларни заболувања и го намалува нивото на лошиот холестерол.

Во комбинација со витаминот Ц, лубеницата е одличен борец против слободните радикали кои ги оштетуваат клетките го организмот.

Спречува дехидрираност

Како што споменавме, лубеницата во најголем процент е составена од вода, па во овие жешки летни денови одлично ќе се освежи и ќе ги надомести течностите кои сте ги изгубиле во текот на денот поради високите температури.

Ги намалува килограмите

Поради растителните влакна кои ги има во себе, лубеницата и во нормална и во течна форма дава чувство на ситост и полн стомак. Нормално, не содржи воопшто масти и многу малку овошен шеќер, што ја прави одличен избор за здрав режим на исхрана.

(О)Милена | Црнобело
Фото: (О)Милена