На гости кај Ана Најдовска: Стан на Македонка во Осло, уреден во скандинавски стил со хиге елементи (фото)

Детали

сабота, 11 март 2023

„Станот се наоѓа во најцентралниот дел на Осло, и е мал, но премногу симпатичен, посебно откога го уредивме во тој препознатлив скандинавски стил. Со многу хиге елементи, детали, перничиња, вазни и свеќи...“, споделува Ана Најдовска од Скопје, на која Норвешка ѝ е дом, за CRNOBELO.com.

Ана Најдовска од Скопје со сопругот и ќерката живее во стан во Осло, Норвешка.

Ана обожава да патува, да истражува нови места (нови улички со карактеристични згради и прекрасна архитектура ѝ се слабост), сака да приготвува здрави јадења, да си го средува домот посебно кога ќеркичката Оланна е во градинка тогаш вели дека сè мора да си биде на свое место, и откога сè ќе биде на свое место, тогаш обожава да си го испие првото кафе во омилената шолја.

Мали нешта ја прават среќна, како што се нова свеќа или ново перниче, а мото ѝ е Carpe Diem или „Зграпчи го денот“.

Никогаш не се остава без обврски, мора да е активна и продуктивна, бидејќи ако се остави без никаква задача во текот на денот има грижа на совест дека денот ѝ поминал залудно.

Затоа обожава да си задава по неколку задачи за деновите што следат и преубаво ѝ е чувството кога на крај од денот знае дека го направила тоа што го замислила за тој ден, а последен во низата нејзини проекти беше уредувањето на нивниот нов стан во Осло.

Веќе имавме можност да го видиме станот во кој парот претохдно живееше.

За уредувањето на нејзиниот дом Ана за CRNOBELO.com споделува:

„Кога сме кај зацртани цели пред два месеци ми се исполни желбата која беше и една од целите за 2023, а тоа е да си го уредиме нашиот стан во Осло кој до сега беше празен и го издававме под кирија.

Во последните 6 години живеевме во 5 различни земји, таму каде што сопругот Чума играше фудбал, па така никогаш немавме можност да си живееме во наш дом.

Станот се наоѓа во најцентралниот дел на Осло, и е мал, но премногу симпатичен, посебно откога го уредивме во тој препознатлив скандинавски стил. Со многу хиге елементи, детали, перничиња, вазни и свеќи.

Преовладуваат неутралните тонови, беж бојата е една од моите омилени кога станува збор за дизајн на ентериер, лесно може да се искомбинира со други впечатливи тонови на бои, а и со неутрални нијанси како што се сива, пастелните тонови и песок боја.

Од самиот почеток се договоривме со сопругот дека јас ќе бидам таа што ќе го „уреди“ домот.

Па, така изминатите 3 месеци поминати на Pinterest дефинитивно се исплатеа, бидејќи ме инспирираа да го претворам нашиот дом во тоа што првично посакував и замислував.

Продолжува на следната страна...