На гости кај Ева Јакимовска: Стан од 65m2 во Скопје на поткровје со закосени тавани, во кој преовладува белата боја

Детали

сабота, 16 декември 2023

„Имав желба да имам мое катче за шминкање во спалната соба, простор кој е лично мој. Сакав во станот да се чувствувам удобно, а по напорниот ден да уживам опуштајќи се со музика, но тоа да биде и простор кој ќе ме потсетува на организираност, ред и дисциплина“, вели Ева Јакимовска за својот дом која е главна и одговорна уредничка на магазинот „Бекстејџ“.

Ева Јакимовска (29) е главен и одговорен уредник на естрадниот магазин „Бекстејџ“, а работи и како ПР-менаџер. Таа од неодамна живее во стан од 65m² во населбата Кисела Вода во Скопје, кој се наоѓа на поткровје и има закосени тавани.

Во домот на Ева преовладува белата боја и светли тонови, а деталите во боја го разигруваат просторот и му даваат живост.

За CRNOBELO.com, Ева вели дека иако на почетокот не знаела што точно сака да направи, денес е задоволна од крајниот изглед на нејзиниот дом и ужива во секој момент поминат таму:

„На почеток, пред да започнеме со уредувањето на мојот дом, најмногу време поминував на Pinterest, разгледувајќи различни стилови на уредување.

Не бев сигурна што е тоа што го сакам, но знаев дека сакам да биде нешто модерно и убаво.

Сакав да биде простор во кој ќе се чувствувам удобно, во кој по напорниот ден би уживала опуштајќи се со музика, но да биде и простор кој ќе ме потсетува на организираност, ред и дисциплина.

Може тоа е и една од причините поради кои ‘нередот го држам под контрола’.

Низ процесот на уредување на станот постојано бев во консултација со најблиските, а консултирав и стручно лице - архитект за ентериерот.

Секоја идеја беше добредојдена, а при реализацијата стануваше и многу подобра.

Продолжува на следната страница...