Во домот на битолчанецот Сашо на Флорида: Куќа со базен, 5 спални соби и околу 400 растенија

Детали

сабота, 05 октомври 2024

„Ова е голема куќа со 5 спални соби, гаража за 3 возила, посебна просторија за домашна канцеларија, трпезарија, кујна и огромен дневен простор“ – појаснува за CRNOBELO.com битолчанецот Сашо Божиновски кој живее во Тампа, Флорида.

Сашо Божиновски (49) е битолчанец по потекло, кого неговите сограѓани го знаат како „Сашо Краљ“. Роден и пораснат на битолскиот Широк Сокак, каде во минатото имал и свое фризерско студио, во 2013-та година одлучил да ја напушти Македонија и да си ја побара среќата прво на работа на крузер, а потоа и во САД.

Денес дом му е Тампа, Флорида.

Самиот раскажува дека кога се преселил во САД, прво живеел на Флорида, за потоа две години да се пресели во Далас, Тексас, и потоа пак да се врати во Флорида, каде што живее во последните неколку години.

Сашо е огромен љубител на растенија и животни, има две кучиња, два папагали, аквариум со над 50 рипки и околу 300 до 400 растенија.

Тој во изјава за CRNOBELO.com раскажува дека во периодот кога со партнерот се вратиле на Флорида пазарот за недвижности не бил добар, па 2 години останале да живеат во стан во строгиот центар на градот.

„Размислувавме за купување куќа, но за жал пазарот за недвижности и не беше баш добар во изминатите години. Во тој стан останавме 2 години.

На почетокот на годината започнавме со потрага на она што се вика „куќа од соништата“. Конечно после еден куп видени куќи ја пронајдовме куќата каде денес живееме.

Секако имавме листа за тоа што бараме и сакаме и оваа куќа имаше баш сè.

Ова е голема куќа со 5 спални соби, гаража за 3 возила, посебна просторија за домашна канцеларија, трпезарија, кујна и огромен дневен простор плус внатрешен балконски простор или фамилијарна соба, но и посебен простор – перална.

Мојата куќа има огромен заден двор, простор за опуштање и базен, и секако голем двор од предната страна на куќата пред влезот.

Дворот и базенот можеби беа пресуден фактор за купување на куќата.

За среќа ние го завршивме тој процес на купување релативно брзо, врз основа на нашата работа и заштедата која ја имавме“ – раскажува Сашо.

Тој вели дека една од причините заради којашто се одлучиле за куќа со голем двор е францускиот булдог Бело, кој има 6 години, а ужива да биде надвор на сонце и да се топли.

„Од скоро го имаме и Бруно, 5 месечен ротвајлер. Едно големо, баш големо бебе, кое сака да трча низ дворот да се брка со Бело и секако да прави пакости.

Покрај Бело и Бруно имам и два папагали, Роко и Луна, и исто така имам и два аквариуми со можеби 50 различни риби (повеќето од нив златни риби).

Но, не завршуваме тука.

Покрај оваа мини зоолошка градина, јас поседувам можеби, велам можеби, преку 300 или 400 растенија. Одамна престанав да ги бројам зошто навистина веќе и не можам.

Имам толку многу, а и немам толку многу. Има толку многу растенија што сè уште ги немам, но сè во свое време.

Домашни растенија, цвеќиња, тропски растенија, растенија дома, надвор – секаде. Имам банана дрва, ананаси, различни палми. Една мала џунгла“ – ни појаснува Сашо.

Продолжува на следната страница...