Симптоми кои укажуваат на хипертироидизам или зголемена активност на тироидната жлезда – зошто се јавува и има ли терапија?

Хипертироидизмот е состојба при која тироидната жлезда лачи повеќе хормони и со тоа предизвикува цела низа симптоми, како нагло слабеење, промени во менструалниот циклус и тахикардија. Ако не се третира или контролира, може да предизвика компликации со очите, но и други делови од телото.

Хипертироидизмот претставува зголемена активност на тироидната жлезда. Оваа состојба може да го забрза метаболизмот на телото, и со тоа да предизвика низа симптоми, но и здравствени проблеми.

Тироидната жлезда лачи хормони кои регулираат многу процеси во телото, како метаболизмот, пулсот и телесната температура.

Па, кога во организмот се лачат премногу од овие хормони, страда целиот организам.

Зошто се јавува хипертироидизам?

Хипертироидизмот може да се јави од многу причини.

Можеби најчестата е таканаречената Базедова болест – забележана е кај околу 3 од 4 лица со хипертироидизам.

Оваа болест е всушност автоимуно заболување при кое имунитетот почнува да ја напаѓа тироидната жлезда, поради што таа почнува да лачи повеќе хормони.

Не е позната точната причина за појавата на болеста, но најчесто е забележана кај млади и средовечни жени, а неретко е и наследна. Се верува дека и пушењето може да го зголеми ризикот.

Поретка причина за хипертироидизам се тироидните нодули. Нодулите обично се бенигни, но можат да предизвикаат зголемено лачење на тироидни хормони.

И овојпат, причината за нивната појава не е позната, но најчесто се јавуваат кај лица постари од 60 години.

И некои лекови можат да предизвикаат хипертироидизам. Обично ова се лекови кои содржат јод.

Ако причината за хипертироидизмот се лекови, функцијата на тироидната жлезда би требало да се врати во нормала откако ќе престанете со терапијата.

Постојат и поретки причини за појава на хипертироидизам, како воспалување или рак на тироидната жлезда.

Кои се симптомите на хипертироидизам?

Симптомите што ги предизвикува хипертироидизмот можат да изгледаат како бројни други здравствени проблеми.

Затоа, ако забележите неколку, добро би било да одите на лекар за да добиете соодветна дијагноза, а со тоа и терапија.

Дел од најчестите симптоми:

• Необјасниво слабеење
• Тахикардија или аритмија
• Зголемено чувство на глад
• Анксиозност и раздразливост
• Промени во менструалниот циклус
• Оток во областа на тироидната жлезда
• Замор и слабост во мускулите
• Кршлива коса
• Проблеми со спиењето

Дали има лек и какви компликации можат да настанат?

Ако не се третира, хипертироидизмот може да предизвика други компликации, вклучувајќи:

• Проблеми со очите, како иритација или двоен вид
• Компликации во бременоста, како спонтан абортус или предвремено породување
• Во ретки случаи, таканаречена „тироидна бура“, односно состојба во која симптомите нагло се влошуваат
• Остеопороза – состојба која ги ослабува коските и го зголемува ризикот од скршеници

Добрите вести се дека денес постојат третмани за хипертироидизам.

Еден од почестите е терапија со лекови кои го намалуваат лачењето на тироидните хормони. Штом нивото на хормоните ќе се нормализира, вашиот лекар можно е постепено да ви ја намалува дозата и на крај целосно да престанете со терапијата.

Сепак, некои луѓе целиот живот ќе треба да пијат вакви лекови.

Постои и вид радиотерапија со која се уништуваат клетките од тироидната жлезда, а со тоа се намалува лачењето на тироидните хормони.

Иако овој третман е ефикасен, не се препорачува за бремени жени и доилки. Исто така, не се препорачува за лица кои имаат сериозни проблеми со очите поради хипертироидизмот.

Во некои случаи, лекарите препорачуваат и операција со која се отстранува дел или целата тироидна жлезда.

Операцијата се зема предвид ако тироидната жлезда е многу отечена, пациентот има сериозни проблеми со очите, не смее да прима друга терапија за хипертироидизам или ако симптомите на пациентот постојано се враќаат.

Но, ако се отстрани тироидната жлезда, пациентот ќе треба да пие лекови целиот живот, па затоа операцијата најчесто е последна опција за лекување.

Спирова С. | Црнобело