4 работи за перименопауза што секоја жена над 35 години треба да ги знае

Симптомите на перименопауза обично се јавуваат по 40-тата година, но кај некои жени може да се јават и порано. Перименопаузата е процес на транзиција кон менопауза и во некои случаи може да трае и повеќе од осум години.

Секоја жена знае што е менопауза и на некој начин психички се подготвува за овој период од животот.

Сепак, многу поретко се зборува за перименопауза – периодот кој е како транзиција кон менопаузата.

Исто како и менопаузата, и перименопауза предизвикува низа симптоми кои кај некои жени се поизразени и можат да им го попречат секојдневното функционирање.

Перименопаузата е непредвидлива и е причина за хормонални промени кои имаат влијание врз психофизичката состојба на жената.

Во просек, симптомите на перименопауза почнуваат по 40-тата година, но кај некои жени можат да се јават порано – околу 35-тата година.

Неколку работи што секоја жена треба да ги знае за перименоапузата:

Може да трае неколку години

Перименопазуата може да почне и до 10 години пред менопаузата.

Симптомите на перименопауза обично траат околу четири години, но кај некои жени можат да траат и осум, па и десет години.

Во некои случаи, симптомите на перименопауза траат и само неколку месеци.

Генетиката може да има улога

Некои истражувања покажуваат дека можно е гените да имаат влијание врз тоа на која возраст почнува менопаузата, но и кои симптоми ќе се појават.

Ако мајка ви порано влегла во перименопауза, можно е исто да биде и во вашиот случај.

Ова може да важи и за симптомите – оние што ги чувствувала вашата мајка или вашата баба, можно е да се јават и кај вас.

Предизвикува низа неочекувани симптоми

Некои од најчестите симптоми на перименопауза се промени во менструалниот циклус, ноќно потење и ненадејно чувство дека ви е многу жешко.

Но, поради хормоналните промени, може да се јават и други, по малку изненадувачки симптоми, како:

• Проблеми со кожата
• Болка за време на секс
• Панични напади
• Анксиозност
• Сува уста
• Чувствителни гради
• Намалена желба за секс
• Зачестено одење во тоалет
• Променливо расположение

Не заборавајте дека перименопауза ќе помине

За некои жени, симптомите се мошне изразени и можат да им создаваат проблеми во секојдневието.

А, дури и поблагите симптоми можат да бидат проблематични.

Но, кога сте фрустрирани, потсетете се дека перименопаузата е нормален процес и нема да морате да ги трпите симптомите целиот живот.

Ако некои симптоми ви претставуваат сериозен проблем, секогаш е добро да се консултирате со лекар.

Во меѓувреме, водете и добра грижа за здравјето бидејќи со ова можете да ги ублажите симптомите.

Односно, хранете се здраво, редовно вежбајте, намалете со алкохол и брза храна, медитирајте за да се справите со стресот…

Спирова С. | Црнобело