Херпес на уста - Зошто се појавува и како да го третирате?

Откако ќе се зарази со вирусот, личноста ќе го носи во себе до крајот на својот живот. Некои луѓе некогаш немаат никакви симптоми, додека други имаат периодични појавувања на инфекции. Која е причината за херпес на устата и како да се справите со него?

Оралниот херпес е инфекција предизвикана од вирусот херпес симплекс (HSV).

Овој вирус предизвикува болни ранички, најчесто на или околу усните, но може да се појави и на јазикот, под носот или на внатрешноста од образите.

Херпесот може да предизвика и други симптоми како треска или болки во мускулите, особено при првото инфицирање на личноста.

Како изгледа херпесот на уста и кои се неговите симптоми?

Херпесот на уста, кога е во рана фаза, предизвикува меурчиња исполнети со течност. Може да имате една или две големи плускавици или неколку мали кои се спојуваат во една голема рана.

Во подоцната фаза на орален херпес, најчесто по неколку дена, меурите ќе се отворат и ќе испуштат жолтеникава течност. По уште неколку дена, раните ќе добијат лушпа и ќе почнат да зараснуваат.

Што се однесува до симптомите, на почетокот може да забележите црвенило, оток, топлина, болка или чешање во областа каде што ќе избие инфекцијата.

Симптомите на оралниот херпес може да се исти или слични со други здравствени проблеми, па затоа, за дијагностицирање секогаш посетете го вашиот лекар.

Како се пренесува херпесот на уста?

Вирусот се шири кога едно лице ќе има контакт, кожа со кожа, со друго инфицирано лице.

Најчесто првите инфекции се појавуваат во детството или како млади возрасни, а може да се пренесе со бакнување, допирање на кожата на заразеното лице или споделување на заразени предмети како балсам за усни, прибор за јадење, жилети и слично.

Откако ќе се зарази со вирусот, личноста ќе го носи во себе до крајот на својот живот. Некои луѓе некогаш немаат никакви симптоми, додека други имаат периодични појавувања на инфекции.

Генерално, херпесот почесто се појавува во првата година по првичното заразување, а потоа неговата изразеност се намалува, односно, не се појавува толку често и не е сериозен.

Како да го третирате херпесот на уста?

Кога ќе почувствувате печење или чешање, треба што побрзо да започнете со употреба на медицински кремови, масти и други препарати со антивирусно дејство наменети за орален херпес.

Тие средства најчесто се нанесуваат три до петпати на ден, но само додека не излезат плускавиците.

Откако веќе ќе се појават, треба да користите средства кои имаат антисептично дејство, го намалуваат чешањето и помагаат плускавиците да се исушат и кожата да зарасне.

Исто така, фластерите за херпес се практични, бидејќи физички ја штитат оштетената кожа и ја намалуваат можноста да се прошири инфекцијата.

Секогаш консултирајте се со вашиот лекар или фармацевт во врска со тоа како треба да го третирате херпесот на уста.

Доколку користите маст, секогаш користете чист памук кој по употребата веднаш ќе го фрлите, со цел да го спречите ширењето на инфекцијата на други делови од телото.

Исто така, може да користите ладни облоги на плускавиците, за да си ја смирите болката. Притоа, важно е да пиете и многу течности, а особено ладните пијалаци може да ви помогнат во смирување на раните во и околу устата.

Сепак, треба да се спомене дека нема магичен лек, туку самиот херпес ќе помине спонтано за седум до десет дена.

Ако сепак сте загрижени и чувствувате дека имате влошување на симптомите, веднаш консултирајте се со вашиот лекар кој ќе ви ја следи состојбата и ќе ве упати за понатамошно лекување.

М. Ѓ | Црнобело / фото: freepik.com