Дали вашето дете има инфекција со стрептокока или обичен вирус - како да ги разликувате симптомите?

Дали имате стрептокока или обична настинка? Зошто детето се жали на болно грло? Како да знаете дали носето тече од обична настинка или е предизвикано од бактеријата? Како да познаете дали веднаш треба да се јавите на лекар?

Најчесто болното грло може да биде предизвикано од вирусни инфекции, но понекогаш болката може да се јави како резултат на болести што се предизвикани од различните видови на бактеријата стрептокока.

Овие бактерии може да предизвикаат инфекции на грлото, инфекции на средното уво, пневмонија, па дури и да предизвикаат менингитис (инфекција на кората на мозокот и на ‘рбетниот мозок), па затоа е мошне важно навреме да се детектираат.

За да се утврди присуството на бактеријата неопходно е да се направат детални испитувања, но постојат повеќе симптоми што веднаш укажуваат на тоа дека ситуацијата е сериозна и дека треба веднаш да се јавите на лекар.

Бактеријата стрептокока најчесто опстојува во носот и во грлото, а е мошне заразна и се проширува лесно.

Заразените лица може да ја прошират бактеријата преку говор, кашлање или кивање, а најчесто од вакви инфекции страдаат децата на возраст од 5 до 15 години, како и родителите чиишто деца одат во градинки и училиште, или наставниците и негувателите.

Лицата се заразуваат ако ги вдишат респираторните остатоци од лицето што е заболено со бактеријата, ако допрат нешто каде што има респираторни остатоци, а потоа се допрат за устата или носот, или ако пијат од истата чаша или јадат од истата чинија од која јадело лицето што е заразено со бактеријата стрептокока.

Вообичаено периодот на инкубација на бактеријата трае од 2 до 5 дена, пред лицето што било изложено на бактеријата да се разболи.

Стрептокока група А

Инфекцијата на грлото со стрептокока, најчесто е предизвикана од бактеријата Streptococcus група А.

Се лекува само со антибиотици и затоа е неопходно при првите симптоми веднаш да се јавите на лекар.

За да се утврди точна дијагноза ќе треба да се направат дополнителни брисеви и испитувања, но најчесто знаците на инфекцијата на грлото со стрептокока се видливи и со голо око.

Најчестите симптоми вклучуваат:

• покачена телесна температура,
• болка при голтање,
• црвени и отечени крајници,
• бели точки или линии со гној на крајниците,
• мали, црвени точки на врвот на устата,
• отечени лимфни јазли на предниот дел од вратот.

Освен тоа, кај инфекцијата на грлото предизвикана од стрептокока, болката во грлото се јавува ненадејно, а на прв поглед грлото изгледа црвено.

Поретко може да се случи децата да повраќаат, да се жалат на главоболка, болка во стомакот и гадење.

Кај инфекциите на грлото со стрептокока најчесто нема течење на носот, кашлица, засипнатост на гласот или конјуктивитис.

Ако детето ги има овие симптоми (а ниту еден друг од претходните) тогаш најверојатно се работи за вирусна инфекција за која не треба антибиотик, но секако е најдобро да се консултирате со лекар.

Вообичаено, по неколку дена земање антибиотици детето се чувствува подобро.

Пневмонија предизвикана од стрептокока

Друга мошне распространета бактерија е и Streptococcus pneumoniae. Најчесто се пренесува преку директен контакт со лице што е заболено или пак преку допирање предмети на кои ја има бактеријата.

Кај лицата заразени со бактеријата може да се јави инфекција на увото, сепса (труење на крвта) и пневмонија.

Доколку не се лекува може да предизвика менингитис (воспаление на кората на мозокот и на ‘рбетниот мозок) или инфекции на синусите.

Првите симптоми за присуство на бактеријата се ненадејна појава на температура и треска.

Други симптоми што може да се појават се:

• главоболка,
• кашлица,
• болка во градите,
• дезориентираност,
• отежнато дишење,
• омалаксаност,
• а понекогаш и вкочанетост на вратот.

Исто како за инфекцијата на грлото и инфекцијата на носот се лекува со антибиотици, па затоа неопходно е при првите симптоми да се јавите на лекар.

По деталните испитувања лекарот ќе ви даде понатамошни препораки за тоа како треба да го продолжите лекувањето.

 Б. С. Б. | Црнобело/ фото: freepik.com