Како да ја намалите видливоста на црвените точки на нозете по депилација и бричење?

Направете пилинг на кожата пред да ги отстраните влакната, а по депилација или бричење, ставете облога со мраз.

Без разлика дали ги отстранувате влакната на нозете со бричење или депилација, сигурно досега ви се имаат појавено мали црвени точки.

Црвените точки по бричењето се мала иритација на кожата предизвикана од влакненцата кои се веднаш под површината.

По депилација, пак, црвените точки се мало воспаление кое настанува поради целосното отстранување на влакната, вклучувајќи ги и нивните корени.

Иако не можете целосно да ја избегнете појавата на овие црвени точки, постојат трикови кои ќе ви помогнат да ја намалите нивната видливост.

Погледнете како:

Редовно нанесувајте лосион за тело

Црвените точки ќе бидат многу поизразени на сува кожа.

Затоа важно е редовно да нанесувате хидратантен лосион секојдневно, но избегнувајте го на денот на депилацијата. 

Движете го бричот во насоката на растење на влакната

Бричењето во спротивната насока од растењето на влакната може полесно да ја иритира кожата, а со тоа црвените точки да бидат повидливи.

На овој начин ќе го намалите и ризикот од појава на поткожни влакна.

Направете облога со мраз

Мразот може да ја „смири“ иритираната кожа и да ја намали видливоста на црвените точки по бричење или депилација.

Само, немојте да ставате мраз директно на кожата бидејќи можете да ја оштетите.

Ставете неколку коцки во чиста крпа и со неа поминувајте по кожата.

Направете пилинг на кожата

Пред бричење или депилација, направете пилинг на кожата за да ги отстраните мртвите клетки и нечистотиите од неа.

Само бидете внимателни – користете нежен пилинг и немојте премногу да ја триете кожата за да не ја влошите иритацијата.

Исчеткајте ја кожата

Има многу придобивки од сувото четкање на кожата. Покрај тоа што прави пилинг, може да ја подобри циркулацијата на крвта и да ја подобри состојбата на кожата.

За суво четкање ќе ви треба поголема четка за тело со помеки влакна кои нема да ви направат гребаници.

Направете маска со сода бикарбона

Сода бикарбоната може да ја намали иритацијата на кожата, а со тоа и видливоста на црвените точки.

За да направите маска, измешајте половина шолја овес, три лажици сода бикарбона и две лажици мед. Додајте и една лажица лосион за тело и добро измешајте.

Нанесете ја смесата на нозете и оставете да делува 15-тина минути, па добро исплакнете со студена вода. На крај ставете лосион.

Можете да ја користите оваа маска двапати неделно.

Дајте ѝ предност на депилацијата

Црвените точки од депилацијата се повлекуваат по само два-три дена, а кај некои дури и истиот ден.

Од друга страна, црвените точки од бричењето можат да се познаваат подолго. Притоа, за мазна кожа ќе треба да се бричите речиси секој ден, што значи постојано ќе ви се создаваат црвени точки.

Па, кога можете, давајте ѝ предност на депилацијата.

Спирова С. | Црнобело