Велигденски базари во европските градови кои се како пролетна бајка

Кои европски градови се претвораат во вистинска велигденска бајка пред празниците?

Слично како за време на божиќните, така и за велигденските празници, во голем број европски градови се одржуваат тематски базари, каде може да уживате во локалната храна, но и да си купите рачно изработени декорации поврзани со празникот.

Освен што се поврзуваат со велигденските празници, овие базари често се поврзуваат и со доаѓањето на пролетта, a најчесто се одржуваат во втората половина на март и на почетокот на април.

Во продолжение погледнете кои се најпознатите велигденски базари во Европа:

Виена, Австрија (16.03 - 01.04)

Освен што таму се одржува еден од најпознатите божиќни базари, во Виена, исто така се одржува и прекрасен велигденски базар.

На тезгите може да се најдат голем број декоративни јајца, кои се наменети за велигденските дрвја (Osterbaum).

Исто така, на околу 300 километри од Виена, во Салцбург се одржува велигденски фестивал, каде можете да проследите голем број изведби на класични музичари и оперски пејачи.

Од Виена до Салцбург се патува со воз, а патот трае околу 2.5 часа.

Колмар, Франција (28.03 – 21.04)

Колмар е една од омилените дестинации за патување пред божиќните празници, а се смета дека има посебен шарм и во пролет, односно во периодот пред велигденските празници.

Магичното француско гратче кое било инспирација за насликаните куќи во анимираниот филм „Убавицата и ѕверот“ е декорирано во духот на велигденските празници, а на тезгите се продаваат голем број рачно изработени декорации и локални специјалитети.

Овој базар во Колмар е познат и како „Фестивал на пролетта“.

Прага, Чешка (16.03-07.04)

Во Прага има повеќе велигденски базари кои не се на многу голема оддалеченост едни од други.

Освен што можете да купите ракотворби и да уживате во локалната храна, секоја вечер има и богата културна програма со музика и танц.

Краков, Полска (21.03 – 02-04)

Во периодот пред Велигден, во Краков се одржуваат повеќе велигденски базари, каде може да се купат голем број декорации и рачни изработки, а можете да уживате и во локалната храна.

Бонус: Фестивал на лалињата во Амстердам

Во главниот град на Холандија во овој период не се одржува велигденски базар, но затоа во периодот околу велигденските празници има фестивал на лалињата.

Б. С. Б. | Црнобело