Британска новинарка воодушевена од Македонија: „Бев во една од најмалку посетените европски дестинации, останав без здив“

„Како земја без излез на море, Македонија нема крајбрежје со кое ќе ги привлече британските туристи кои се гладни за сонцето. Но, не ѝ треба море, кога е дом на прекрасното Охридско Езеро и неговите плажи“, вели Естер Маршал и ги охрабрува Британците што помасовно да ја посетуваат нашата земја.

Британската новинарка Естер Маршал од 2021 година пишува патувачки репортажи за Express.co.uk. Таа во изминатите години посетила многу европски земји и споделила совети со читателите за секоја од нив.

Естер неодамна беше и во Македонија и од земјата си замина со многу убави впечатоци.

Таа вели дека Македонија ја оставила без здив, па порача дека не смее да биде потценета дестинација и ги охрабри читателите да ја посетат земјата и да уживаат во нејзините убавини.

Што пишува во нејзината репортажа?

„Посетив една од најмалку туристичките земји во Европа и таа дефинитивно заслужува повеќе внимание. 

Без разлика дали се чувствувате како „сардина“ во некое од најубавите европски села или ќе ве пречека хаосот пред Бакингемската палата, мора да признаете дека некои од врвните дестинации во Европа почнаа да стануваат пренатрупани.

Ова лето отидов во една од најнепосетуваните земји во Европа. Македонија прима околу 1,1 милиони туристи годишно, многу помалку од повеќето главни туристички дестинации на континентот.

Сепак, тоа е неверојатно убава земја и има исклучително добра вредност. Па, зошто тогаш има толку малку туристи?

Како земја без излез на море, Македонија нема крајбрежје со кое ќе ги привлече британските туристи кои се гладни за сонцето. Но, не ѝ треба море, кога е дом на прекрасното Охридско Езеро и неговите плажи.

Совршено е и за пливање и за патувања со брод.

Стариот град на Охрид е шармантно место преполно со живописни цркви. А јас уживав во обилен оброк и вино покрај езерото за само 15 евра.

Топка сладолед во убавиот стар град ме чинеше помалку од 1 евро, додека капучиното во луксузно кафуле покрај езерото го платив помалку од 2 евра.

За среќа на Британците, неодамна почнаа да се нудат пакет аранжмани за посета на Охрид со чартер лет.

Можете да изберете седумдневен аранжман или да си го организирате патувањето сами.

Така, јас резервирав преку Airbnb сместување кое имаше неверојатен поглед од балконот, а чинеше малку повеќе од 20 евра за вечер.

Го посетив и главниот град Скопје. Најголемиот град во земјата е малку чудно место.

Градот беше погоден од катастрофален земјотрес во 1960-тите години, кога околу 80 проценти од него беа уништени. Последниот проект за обнова на градот е малку контроверзен.

Првото нешто што ќе го забележите во Скопје се бројните џиновски статуи.

Во 2014 година, градот започна проект со кој изгради и постави повеќе од 100 статуи. Од воини до пиратски бродови и лавови, едвај има улица без споменик. Иако огромните статуи можеби не се по сечиј вкус, тие секако се нешто што мора да се види.

Не би ви препорачала да поминете повеќе од 2-3 дена во Скопје, но дефинитивно вреди да го посетите главниот град, ако ништо друго, тогаш само за да го истражите кањонот Матка кој се наоѓа во близина.

Кањонот кој го одзема здивот е една од врвните дестинации во Македонија за рекреативно пешачење, но, исто така, е прекрасно место за патување со брод или возење кајак.

Влезот во кањонот не се плаќа, а дотаму се стига за помалку од еден час од центарот на градот.

Јас бев на 30-минутно патување со брод околу кањонот кое ме чинеше околу 6 евра.

Wizz Air лета директно за Скопје, а цените се достапни, па може да се најдат повратни билети за околу 80 евра.

Иако нема директна авионска линија до Охрид, езерото е на помалку од три часа возење од главниот град.

Охрид е лесно достапен и од Албанија“.

А. Ј. | Црнобело