Не е Мексико, Демир Капија е – Долината на кактусите е редок природен феномен во Македонија (фото)
Кога се споменуваат кактуси во природа, честопати пред очи ни излегуваат егзотични локации со пустински предели, како Мексико и јужен САД, но долина со ретки видови кактуси има и во Македонија и тоа во Демир Капија.
Долината на кактусите е месност над напуштеното село Клисура, што се наоѓа на 7 километри од селото Демир Капија, а до неа може да се дојде преку асфалтниот пат до самото село.
Голем број Македонци веќе биле и го посетиле овој редок природен феномен, а тој честопати се споменува како едно од местата што задолжително треба да ги посетите кога барате места во кои можете да уживате во природа.
Самата Демиркаписка Клисура плени со својата грандиозност и големина, со чистиот воздух и природната убавина, а внимание привлекуваат и овие растенија што неочекувано се доселиле и успеале да преживеат во нашите услови.
Посебниот вид џуџест кактус успеал да се прилагоди на природните климатски услови во Демир Капија и да опстане, благодарение на топлата медитеранска клима од Егејот, а зачудувачки е и тоа што овие прекрасни билки преживуваат и во зима, кога наѕираат под снегот.
Се претпоставува дека овие ретки кактуси до Македонија стигнале благодарение на птиците преселници кои го донеле семето во Македонија, а со текот на времето растенијата се рашириле на поголема површина.
Без разлика дали се насадени од човечка рака, или настанале како природен феномен, кактусите во Демир Капија во изминатите неколку години привлекуваат сѐ поголем број туристи, кои одат таму за да уживаат во планинската природа, планинарењето, велосипедизмот, риболовот и алпинизмот во прочуената Демиркаписка Клисура.
Градоначалникот на општината, Лазар Петров, на својот Фејсбук профил сподели повеќе фотографии од кактусите.
Погледнете ги во продолжение:
Б. С. Б. | Црнобело
Би можело да ве интересира:
Препорачуваме
Најчитани неделава
