8 вежби за фитнес на работа

Помогнете му на вашето тело да се избори со последиците од седењето пред компјутер по цел ден и искористете ја канцеларијата за да ја затегнете линијата.

 

Болките во грбот, лошата циркулација, главоболката и здрвувањето на нозете или рацете сигурно ви звучи познато?

Свесни сте за последиците од седењето пред компјутер по осум часа секојдневно, но дали знаете дека постојат неколку трикови против овие проблеми кои можете многу едноставно да ги примените и тоа во вашата канцеларија?

Нека ви послужи работниот простор и како место за релаксација. Искористете прилика да ги истегнете мускулите и да добиете дополнителна енергија.

Овие вежби можат да ви помогнат да си дозволите малку луксуз и да се посветите на вашето здравје.

1. Протегнете ги главата и рацете додека седите

Полека навалете ја главата кон рамената и задржете ја 10 секунди. Опуштете ги рамената за да бидете флексибилни. Свртете ги рамената прво нанапред, па со кружни движења полека наназад. Повторете го ова десетина пати. Потоа почнете со вежби за рацете, така што ќе ги испружите двете раце, а дланките ќе ги свртите надоле. Задржете ја таа положба три секунди, потоа свртете ги дланките нагоре.

2. Поместувајте ги стапалата во насока на стрелките на часовникот

Седнете на столчето под прав агол од 90 степени, а стапалата поместувајте ги во насока на стрелките на часовникот, прво едното, па другото. Оваа вежба ќе ви ја врати енергијата и ќе направи побрзо да ви се движи крвта низ телото.

3. Испружете ги нозете во висина на колковите

За да ги затегнете стомачните мускули, кренете ја едната нога на висина на колкот и задржете ја 10 секунди. Оваа вежба повторете ја 15 пати, а потоа сменете ја ногата. Потоа следи моментот кога треба да ги подигнете двете нозе и наизменично ставајте една под друга, држејќи ги во воздух.

 

4. Правете чучнувања со помош на столче

Станете и исправете се. Свртете се со грбот кон столчето и со рацете фатете се за него. Доколку во канцеларијата имате само столче на тркалца, кое би ви се лизнало уште при првиот обид и ќе завршите на подот, подобро е оваа вежба да ја правите со помош на работната маса. Придржувајте се за нејзината работна површина и полека спуштајте се под агол од 90 степени.

5. Танц околу столчето за затегнати мускули

Станете и застанете зад столчето, цврсто фатете го како да се подготвувате за танц. Одвојте ја едната нога од телото на страна и почнете да ја вртите со кружење во време од 30 секунди. Потоа, истата вежба повторете ја и со другата нога.

6. Теговите заменете ги со шишиња вода и зацврстете ги рацете

Држете шише вода во десната рака, исправувајте ја во правец на рамото, а потоа свиткајте ја кај лакотот и свртете ја 15 пати. Можете да практикувате и само бавно одвојување на раката од телото на страна и враќање назад, така што вежбата ќе ја повторите 15 пати, а потоа истото тоа ќе го повторите и со другата рака. Ако сакате уште повеќе да се раздвижите со оваа вежба, држете го шишето со вода и движете ја раката зад главата до рамената и назад во висина на градите.

7. Работната маса и столчето за вежби за нозете, задникот и стомакот

Држете ги рацете на работната маса или под неа, седнете исправено на столчето и заедно со нозете истовремено движете ги. Прво испружете ги, задржете ги 3 секунди, па свиткајте ги. Повторете ја оваа вежба 10 пати.

8. Вежбајте на скали

Колку и да сте уморни, натерајте се наместо лифтот да ги користите скалите и да ги истегнете нозете. При тоа, потрудете се со тие чекори да го истегнувате целото тело. Одете полека , така што ќе прескокнувате по една скала. Стапнете со цело стапало , притиснете ја петата и ќе почувствувате како ви се затегнуваат мускулите на нозете и на задникот. Но кога ќе се симнувате потрудете се да стапнувате на секоја скала и да одите со побрзо темпо, бидејќи на тој начин, покрај нозете се затегнуваат и стомачните мускули.