3 лесни јога вежби за трудници – ги намалуваат болките и вкочанетоста

Јога вежбите се одлични за намалување на вкочанетоста и болките кои доаѓаат со бременоста.

Болките во телото не се ретка појава кај трудниците, особено кога се во поодмината бременост.

Тежината на бебето и намалената подвижност може да предизвикаат вкочанетост, неудобност и болка во мускулите и зглобовите.

Јогата е идеалната активност за раздвижување и истегнување, а голем број вежби се соодветни и за трудници, иако некои со мали модификации.

Секако, ако имате многу силни болки, секогаш треба да се консултирате со лекар.

Три јога вежби за трудници со кои ќе се истегнете и ќе ги намалите болките во телото:

Прва вежба

Оваа вежба е позната како „пеперутка“ и може да ја намали болката во долниот дел од грбот.

Ги истегнува и мускулите во областа на карлицата и ја подобрува флексибилноста.

Како да ја направите:

Седнете во удобна положба на подот, свиткајте ги колената кон надвор и спојте ги стапалата.

На подот зад грбот поставете перница и со помош на рацете нежно навалете се кон назад и легнете на перницата.

Останете во положбата околу две минути, со бавно и длабоко дишење.

Втора вежба

Со оваа вежба ќе ги истегнете мускулите и ќе ги намалите болките во горниот дел од телото, особено градите и рамената.

Како да ја направите:

Застанете исправено со нозете во ширина на колковите, а пред вас ставете стол.

Поставете ги рацете на столот – може и на наслонот на столот ако не можете да се наведнете до местото за седење како на фотографијата.

Направете еден чекор назад и наведнете се кон напред со исправени раце држејќи се за столот.

Држете ја положбата 30 секунди, па повторете уште еднаш-двапати.

Трета вежба

Оваа вежба ги истекнува и релаксира колковите и долниот дел од грбот.

Како да ја направите:

Седнете на подот со свиткани нозе – раширете ги колената колку што е потребно за да се чувствувате удобно.

Со испружени раце спуштете се на подот.

Ако сте во поодмината бременост и не можете да се спуштите до долу, слободно ставете перница пред вас, како на фотографијата.

Додека се во положбата можете да правите нежни кружни движења со колковите, за дополнително истегнување.

Останете во положбата околу две минути, со длабоко дишење.

Спирова С. | Црнобело