7 вежби за нозе, идеални ако имате проширени вени

Недостатокот од физичка активност е една од причините за појава на проширени вени, а овие вежби, за кои не треба никаква опрема, можат да ви бидат од корист ако сте соочени со ваков проблем.

Проширените вени можат да се појават каде било, но се најчести на нозете.

Иако обично не се сметаат за сериозен проблем со здравјето, сепак можат да предизвикаат непријатност.

Бидејќи дебелината и недостатокот од физичка активност го зголемуваат ризикот од проширени вени, вежбањето може да биде од корист.

А, постојат и конкретни вежби за нозе кои можат да ви помогнат.

Секако, секогаш е добро и да се консултирате со лекар за проширените вени.

Седум вежби за нозе, идеални за проширени вени:

Прва вежба

Легнете на подот на грб и кренете ги нозете, свиткани под прав агол.

Почнете да правите кружни движења со нозете, како да возите велосипед.

Правете ја вежбата околу една минута.

Втора вежба

Легнете на грб и ставете ги дланките под задникот.

Нозете треба да ви бидат испружени една до друга и исправени.

Кренете ја едната нога, задржете ја неколку секунди во воздух, па спуштете ја на подот.

Направете 10-тина повторувања, па направете ја вежбата со другата нога.

Трета вежба

Застанете исправено со рацете на половина.

Нозете треба да ви бидат во ширина на колковите.

Со едната нога, направете голем чекор напред и клекнете, како на илустрацијата.

Вратете се во почетната положба, па повторете со друга нога.

Направете по пет повторувања со двете нозе.

Четврта вежба

Застанете исправено со нозете во ширина на колковите.

Можете да ги ставите рацете на половината за подобро да држите рамнотежа.

Полека поткренете се и застанете на прсти.

Држете ја положбата неколку секунди, па спуштете се.

Направете што е можно повеќе повторувања.

Петта вежба

Застанете во иста положба како претходната вежба.

Кренете се на прсти, па спуштете се и застанете на пети, па повторно застанете на прсти.

Направете што е можно повеќе повторувања.

Шеста вежба

Седнете на подот со нозете испружени пред вас.

Со дланките пробајте да ги допрете стапалата, без да ги виткате колената.

Треба да почувствувате истегнување во задниот дел на нозете, но не и болка.

Држете неколку секунди, па вратете се во почетната положба.

Направете 20 повторувања.

Седма вежба

Ова е всушност вежба за релаксација, која можете да ја правите кога било, без да ги правите другите вежби.

Легнете на подот, кренете ги нозете и исправени потпрете ги на ѕидот, како на илустрацијата подолу.

Останете во положбата неколку минути.

Спирова С. | Црнобело