Стефан Спирковски за трансформацијата на телото за 60 дена: „Имаше денови кога морав да ‘запнам’“

„Имаше денови кога бев многу мотивиран, а имаше и денови кога не ми беше до ништо. Имаше и доста денови кога телото беше многу уморно. Тоа значеше дека работите што сум ги правел претходно - забава до ‘касни саати’, понекогаш пиење алкохол и недоволно спиење, требаше да се стават на минимум или воопшто и да не се прават“, вели Стефан за својата трансформација.

Нашиот модел и фитнес инфлуенсер Стефан Спирковски, на почетокот на годината почна процес на трансформација на телото, во која му помогна нутриционистот и фитнес тренер, Ивица Јанев.

Стефан во една од првите објави по Нова година откри дека си задал предизвик да си го трансформира телото со сменет начин на исхрана, но и дека ќе продолжи да вежба.

Тој откри и дека ќе работи по програма која е специјално подготвена за него и дека со нетрпение очекува да ги види резултатите.

Два месеца подоцна, Стефан на Инстаграм објави фотографии и видеа од трансформацијата пред и потоа и раскажа за својот пат, за кој, вели, не бил нималку лесен, но тој не помислувал да се откаже.

„Ова е мојата 60-дневна трансформација, на природен начин без било какви забранети супстанци. Пред сè сакам да му се заблагодарам на Ице за целото негово знаење и труд кој го вложи во изминативе 60 дена.

Покрај тоа што беше мој тренер, беше и психолог и ментор од кого секојдновно учев многу работи, како за тренинг и исхрана, така и за mindset и бизнис.

Исто така научив дека телото бара вистински одмор и кога е ден за одмор треба целосно да се одмара, а не да имаш било какви активности, во мојот случај фудбал кој сам си го наметнав, настрана од нашиот договор и план. Сега денот за одмор го ценам многу повеќе.

Се мислам од каде да почнам… Пред сè горд сум и исполнет што дојдов до ова ниво каде што сум денес, иако сфатив и научив многу работи низ изминатиот период - дека животот не е права линија и дека треба да се избориш со многу работи за да стигнеш до целта.

На почетокот на овој предизвик, уште на самиот старт заболев од стомачен вирус, кој не беше ни малку за потценување бидејки ме држеше некои 4 дена без храна и тренинг. Потоа следуваа неколку дена адаптација, фаќање ритам и континуитет со вежбање и исхрана.

Имаше денови кога бев многу мотивиран, а имаше и денови кога имав многу обврски, бев многу нерасположен и не ми беше до ништо. За жал имаше и доста такви денови кога телото беше многу уморно, а јас морав целиот фокус да го насочам да стигнам до целта.

Тоа значеше дека работите што сум ги правел претходно - забава до ‘касни саати’, понекогаш пиење алкохол и недоволно спиење, требаше да се стават на минимум или воопшто и да не се прават.

Скоро секое утро правев кардио на гладно (скали), спремав оброци за текот на целиот ден и попладнето одев на тежински тренинг.

Во тие денови најголема поддршка добивав од Ице, мојата девојка, мојата фамилија и неколку блиски другари, меѓу кои и неколкумина од теретана кои многу добро го разбираат целиот овој процес.

Откако сè изгледаше супер и останаа уште 10-ина дена до крајот на овој предизвик следеше период каде требаше да ‘запнам’ најјако и да го дадам својот максимум.

Се случи повторно разболување - вирус и тоа овој пат со висока темпера и кашлица кој траеше 6 дена. Некако не сакав да се помирам со фактот дека на крајот тоа ќе ме спречи и нема да ми дозволи да го дадам својот максимум.

Продолжив со вежбање и со тоа направив поголема штета, бидејќи го пролонгирав периодот на заздравување. Одморав 3 дена од тренинг и морам да ви признаам дека тие денови воопшто не беа лесни, ама со позитивна мисла и верба во Бога успеав да оздравам и да го дадам максимумот во последните денови.

Фала ви на сите за поддршката која неизмерно ја добивав во целиот овој процес. Се надевам дека поттикавме многумина да почнат со вежбање и со правилна исхрана, а со тоа и да ја направат својата животна трансформација.

Ова е само почеток на мојата трансформација, одиме уште појако“, напиша тој.

По 60-те дена трансформација, Стефан се почести со дупли хамбургер и во видео што го објави на Инстаграм Стори кажа дека заслужил, иако по ова повторно ќе внимава на исхраната.

А. Ј. | Црнобело