Ниту еден Далматинец нема ист број и иста форма на дамки – 10 специфични факти за една од најнеодоливите раси на кучиња

Кога ќе се споменат Далматинцитe, повеќето луѓе како по некој универзален автоматизам се асоцираат со малите точкасти палавковци кои безмилосно ги демнееше добропознатата антагонистка, Круела Девил.

Оваа раса на кучиња се одликува со толку многу карактеристики, таленти и вештини, така што не е воопшто чудно што далматинците се едни од најпосакуваните кучиња ширум светот.

Можеби токму вие размислувате да ја отворите вратата на оваа неодолива раса, но сметате дека не сте доволно „потковани“ , односно не знаете што да очекувате.

Не грижете се. Ќе се обидеме да ви помогнеме.  

Во продолжение ги издвојуваме 10-те најспецифични и најинтересни факти за Далматинците кои ќе ви помогнат полесно да ja разберете природата на овие прекрасни палавковци:

1. Нивното потекло е мистериозно

Како и кај доста постари раси на кучиња, потеклото на Далматинецот е тешко да се утврди.

Некои луѓе веруваат дека овие кучиња потекнуваат од Далмација, регион во денешна Хрватска. Постои теорија дека всушност тие биле воени кучиња и се користеле како чувари.

Други пак, веруваат дека потеклото на Далматинците датира исто колку потеклото на старите Египќани, односно дека во нивните гробници може да се најдат слики од точкасти кучиња кои влечат кочии.

2. Новороденчињата Далматинци немаат дамки при раѓање

Ова е всушност еден од најинтересните факти и е 100% вистинит. Всушност, малите Далматинчиња немаат дамки и се раѓаат сосема бели, а своите препознатливи дамки ги добиваат со самото стареење.

Нивните црни точки почнуваат да стануваат видливи помеѓу втората и третата недела од самото раѓање.

Кога кученцето ќе наполни еден месец, веројатно присутноста на дамките ќе биде јасно видлива, но верувале или не, Далматинците се здобиваат со нивните препознатливи црни точки до крајот на својот живот.

3. Дамките на Далматинците не мора да бидат црни

Кога замислувате Далматинец, најверојатно вашата прва помисла е бело куче со црни точки. Сепак, не сите Далматинци се строго црно-бели.

Препознатливите дамки, покрај примарната црна боја, исто така можат да се појават во повеќе различни бои. Постојат дамки во жолта, кафена, сива, па дури и портокалова боја.

Понекогаш Далматинецот може да има дамки со мешавина од овие бои, но тоа зависи од боите на дамките на неговите родители.

4. Далматинците се исклучително активни кучиња

Како што напоменавме, низ нивната богата историја Далматинците биле користени за безброј активни должности, односно биле среќавани во улогата на воени и ловџиски кучиња, па дури и како изведувачи во циркус.

Пред да се одлучите на оваа раса, имајте предвид дека во домот ви стапнува вистинска „енергетска бомба“.

Доколку живеете во стан, бидете подготвени за фактот дека на Далматинецот ќе му требаат дури и неколку подолги дневни прошетки, како и задолжително истрчување.

Во спротивно, самите тие ќе најдат начин како да се ослободат од вишокот енергија, а истиот веројатно нема да ви се допадне.

5. Далматинците честопати имаат проблем со нивниот слух

Иако немаат големи генетски проблеми, она од што често страдаат Далматинците е оглувувањето. Околу 30% од овие кучиња имаат некаков вид на оштетување на слухот, од делумно губење до целосна глувост.

Причината за ова генетско нарушување лежи токму во нивната препознатливост - дамките.

Кучињата со дамки, а особено кучињата со претежно бело крзно, понекогаш немаат доволно меланоцити - клетки кои произведуваат меланин или потемна кожа и дамки во внатрешниот дел на увото.

Уште 5 факти на следната страна...