По 90 години: Легендарното куче Хачико се сретна повторно со својот сопственик

Многумина ја слушнале приказната или го гледале филмот за најдоброто пријателство меѓу професорот од еден универзитет, кој го глуми Ричард Гир и неговото куче Хачико, кој е снимен според вистинска приказна.

Тие станаа познати благодарение на репортажата на еден јапонски новинар кој во октомври 1932 година, напишал дека на железничката станица едно куче со години, секој ден, во исто време го чека својот покоен газда да се врати од работа.

Приказната всушност почнува со тоа што еден ден, кога професорот се враќал од работа, на железничката станица забележал куче кое многу му се допаднало. Решил да го однесе дома, и покрај противењето на неговата сопруга, одлучил да го задржи.

Поминувале многу време заедно и станале речиси неразделни, а Хачико секојдневно го следел својот сопственик до железничката станица за да го испрати на работа и во точно време го пречекувал кога се враќал.

Еден ден, професорот доживеал инфаркт додека предавал на универзитетот и не се вратил. Сепак, Хачико не престанал да доаѓа на станицата секојдневно околу 5 часот попладне и да го чека својот пријател.

По 10 години чекање, Хачико е пронајден мртов на железничката станица, каде до последниот ден од својот живот ја очекувал средбата со својот омилен пријател.

На станицата Шибуја му е подигнат споменик кој сè уште стои на истото место.

Оваа година се одбележуваат 90 години од смртта на професорот и 80 години од смртта на Хачико.

Во нивна чест студенти од Универзитетот во Токио, каде предавал професорот им подигнале споменик кој ја прикажува нивната конечна средба.

Тие сметаат дека таа средба треба да биде бесмртна исто како и нивното пријателство.