Морничаво: 4 луѓе кои биле закопани живи, но преживеале

По страшна сообраќајка, Анџело Хејс бил прогласен за мртов и погребан. Но, бидејќи осигурителна компанија побарала аутопсија, неговото тело било откопано и тогаш форензичарите сфатиле дека е жив, но во кома.

Пред денешната технологија да ѝ биде достапна на медицината, доста често се случувало лекарите по грешка да прогласат некој за мртов.

Па, многу луѓе се нашле во ситуација да бидат закопани живи.

Ова се случувало толку често, што во дел од европските земји луѓето ставале ѕвонче над гробот, а ѕвончето било поврзано со раката на мртовецот.

Ако личноста била жива и се разбудела во ковчегот, со движењето ќе го заѕвонела ѕвончето, давајќи знак дека треба да ја откопаат.

4 луѓе кои биле закопани живи и преживеале:

Еси Данбар

Во 1915 година, Еси Данбар имала епилептичен напад поради што изгубила свест. Нејзиното семејство било сигурно дека е мртва, а тоа го потврдил и нејзиниот лекар.

Телото на 30-годишната Еси било ставено во ковчег и семејството почнало да се подготвува за погребот.

Бидејќи сестрата на Еси била во друг град, семејството се договорило малку да го одложи погребот.

Но, сестра ѝ се задржала по пат и сепак го испуштила закопувањето.

Гневна бидејќи немала можност за последен пат да ја види Еси, сестра ѝ наредила да го откопаат ковчегот и да го извадат телото.

И, со ова дефинитивно ѝ го спасила животот – штом го отвориле ковчегот, сите сфатиле дека Еси е жива.

Филомел Џонетре

Филомел имала само 24 години кога се заразила со колера во 1867 година. По неколку денови, била прогласена за мртва и шест часа подоцна ја погребале.

Кога гробарите завршиле со закопувањето, тргнале кон дома, но почнале да слушаат тропање.

Штом сфатиле дека звуците доаѓаат од гробот на Филомел, веднаш го откопале гробот, ја извадиле и повикале лекар.

Дланките на девојката биле раскрвавени од обидите да се ослободи, а дишењето ѝ било многу слабо. Сепак, лекарот успеал да ја спаси и ја однел дома.

За жал, Филомел починала наредниот ден, најверојатно од колера.

Анџело Хејс

Во 1937-ма, 19-годишниот Анџело Хејс доживеал несреќа со неговиот мотоцикл.

Тој силно удрил во ѕид и неговото лице било толку деформирано, што на неговите родители не им дозволиле да му го видат телото.

Бидејќи не забележале пулс, лекарите го прогласиле за мртов, а три дена подоцна, Анџело бил погребан.

За негова огромна среќа, осигурителна компанија побарала аутопсија, па два дена по погребот, Анџело бил откопан.

Штом го отвориле ковчегот, форензичарите забележале дека неговото тело уште е топло.

Имено, Анџело бил во кома, поради што потребата за кислород му се намалила, а токму поради ова преживеал два дена под земја.

По бројни операции и терапии, Анџело целосно закрепнал.

Сифо Вилијам

Во 1993 година, 24-годишниот Сифо Вилијам од Јужна Африка доживеал сообраќајна несреќа со вереницата.

Вереницата преживеала, но Сифо бил сериозно повреден и набрзо бил прогласен за мртов.

Сифо не бил погребан, но два дена бил затворен во метална кутија во мртовечница во Јоханесбург.

Кога се разбудил, почнал да вика од страв и, за негова среќа, неколку вработени во мртовечницата го слушнале и веднаш го спасиле.

Спирова С. | Црнобело