Стјуардеса од Југославија преживеала пад од 10.000 метри – авионот се скршил на 3 дела, сите други загинале

Веќе половина век, стјуардесата Весна Вуловиќ држи морничав рекорд – таа е личноста која го преживеала највисокиот пад без падобран, откако паднала од авион кој се движел на висина од 10.160 метри.

На 26-ти јануари 1972 година, Весна Вуловиќ била стјуардеса во авион на авиокомпанијата JAT Yugoslav Airways од поранешна Југославија.

Тој ден Весна била на авион кој летал од Стокхолм до Белград.

За овој лет биле планирани две застанувања – едно во Копенхаген и едно во Загреб. Тогаш 23-годишната Весна се качила на авионот во Копенхаген, но никогаш не стигнала до Загреб или Белград.

Околу 46 минути по полетувањето од Копенхаген, во авионот настанала експлозија во делот каде што бил сместен багажот.

Експлозијата била толку силна, што авионот буквално се скршил на три дела. Поради наглата промена на притисокот во кабината, експертите веруваат дека патниците „излетале“ од авионот и сите, вклучувајќи го и екипажот, загинале.

Но, не и Весна.

Кога настанала експлозијата, младата стјуардеса била притисната од количка за храна на крајот од патничката кабина, па ова ѝ помогнало да остане во авионот.

Делот во којшто се наоѓала Весна паднал врз густа шума во близина на село во Чехословачка. Бидејќи имало многу снег, но и авионот паднал под одреден агол, Весна некако преживеала.

Подоцна лекарите утврдиле дека Весна имала низок крвен притисок, па изгубила свест веднаш штом се променил притисокот во кабината. Ова, пак, го спасило нејзиното срце кое инаку најверојатно би било сериозно отштетно при падот.

Кога ѝ се вратила свеста, Весна сфатила дека е заробена во авионот и почнала да вика, а токму тогаш покрај срушениот авион поминал локален селанец. Тој веднаш ѝ пружил прва помош додека да стигнат медицинските лица.

Овој пад не останал без последици за Весна – таа имала сериозни повреди и поминала неколку денови во кома. Имала скршеници на черепот, двете нозе, пршлените, карлицата и ребрата, а била и привремено парализирана од половината надолу.

За среќа, Весна брзо закрепнала и можела да оди 10-тина месеци по несреќата. Сепак, поради повредата на ’рбетот, до крајот на животот кривела со едната нога.

Кога цела Југославија дознала за Весна, таа станала еден вид народен херој, па добила и почест од тогашниот претседател – Јосип Броз Тито.

Во 1985-та, пак, кога официјално го добила рекордот од Гинис, Пол Мекартни ѝ ги дал сертификатот и медалот. Ова бил посебен момент за Весна бидејќи целиот живот ги слушала Битлси.

Во 1972-ра, кога се случила несреќата, пејачот Мирослав Илиќ отпеал и песна за неа - „Vesna stjuardesa“.

По несреќата Весна открила дека не само што не се сеќавала на ништо за време на падот, туку и воопшто не требало да биде на тој лет.

Имено, авиокомпанијата ја помешала со стјуардеса која исто така се викала Весна, па додека да сфатат што се случило, авионот веќе полетал од Копенхаген.

Весна почина во декември 2016-та на 66-годишна возраст, но нејзината неверојатна приказна сигурно ќе се раскажува уште долго. 

Спирова С. | Црнобело