Како се запознале најпопуларните парови од британското кралско семејство?

Можеби некои љубовни приказни на членовите од британското кралско семејство завршија со развод, но сепак постојат и оние кои го издржале тестот на времето.

На пример, знаевте ли дека принцот Филип и кралицата Елизабета го имаат најдолгиот брак во историјата на британското кралско семејство? Очекувано, со оглед на годините...

Во продолжение дознајте како се запознале Филип и Елизабета, но и другите популарни парови од кралското семејство:

Принцот Вилијам и Кејт Мидлтон

Кејт и Вилијам се запознаа во 2001-ва, во периодот кога и двајцата студираа на Saint Andrews University, а наводно ја почнале врската во 2003-та. Иако тие не ја потврдија врската официјално, јавноста знаеше за нив.

Парот почна да привлекува најмногу внимание во 2008-ма, кога извесен период беа разделени, но сепак присуствуваа на исти настани. Само неколку месеци после разделбата, Вилијам и Кејт ѝ дадоа уште една шанса на врската, а веќе во 2010-та година ја објавија свршувачката.

Принцот Вилијам ја запроси Кејт со прстен кој ѝ припаѓаше на Дијана, а се венчаа во април 2011-та. Сега тие се родители на три деца – Џорџ, Шарлот и Луи – а изворите велат дека Кејт веќе се подготвува за титулата кралица на Англија.

Принцот Хари и Меган Маркл

Меган и Хари се запознаа во 2016-та, на состанок на слепо организиран од нивен заеднички пријател, чиј идентитет уште е мистерија.

Кога јавноста дозна за нив, Меган сподели дека неколку месеци биле во врска, но не кажувале никому. Пред официјално да ја потврдат врската, парот беше на заедничко патување во Боцвана, а тој период Меган сè уште глумеше во серијата Suits.

Конечно, во 2017-та година, тие првпат се појавија како пар, а до крајот на годината ги соопштија вестите за нивната свршувачка.

Хари и Меган се венчаа во мај 2018-та, го добија синчето Арчи, а околу една година подоцна најавија дека се одделуваат од кралското семејство. Денес парот живее во САД, а сега договориле интервју со Опра во кое наводно ќе споделат многу детали за кралското семејство и нивната одлука да си заминат од таму.

Принцот Чарлс и Дијана

Според извори блиски до кралското семејство, Чарлс и Дијана се запознале во 1977-ма, кога таа имала само 16 години. Тој период Чарлс беше во врска со нејзината сестра Сара.

Бидејќи Чарлс редовно го посетувал домот на Сара, често ја гледал Дијана и со текот на времето се вљубил во неа. Во 1980-та тој ја запозна Дијана со неговото семејство и бидејќи доби дозвола од нив да ја продолжи врската, ја побара за жена веќе следната година.

Тие се венчаа во јули 1981-ва, а преносот од церемонијата го следеа над 750 милиони луѓе ширум светот. За жал, после неколку години тие најавија дека се разделуваат, а во 1996-та се разведоа.

Кралицата Елизабета и принцот Филип

Елизабета имала само 8 години кога првпат го сретнала Филип во 1934-та. Пет години подоцна тие повторно се сретнале, а тогаш почнале и да се допишуваат и се вљубиле еден во друг.

Во 1946-та принцот Филип ја побарал раката на Елизабета, но нејзиниот татко, кралот Џорџ, му рекол да почека дури да наполни 21 година. Следната година, кога Елизабета наполни 21, парот се венчаше, а моментално тие го имаат најдолгиот брак во историјата на британска монархија.

Продолжува на следната страница...