Од кралска елеганција до диско мотиви – Топ 7 трендови за декорација на новогодишни елки за 2025

Кралски гламур, диско топки, но и розови декорации… Кои теми на божиќни уредувања преовладуваат годинава? Погледнете ги најактуелните што може да ви послужат како инспирација.

Пред нас се уште едни новогодишни и божиќни празници, а со нивното доаѓање полека започнува и еуфоријата околу декорациите и уредувањето на просторот. Избирање на елка, лампиони, декорации, пред нас е период кој многумина го очекуваат со нетрпение.

Според модните списанија и дизајнерите оваа година ќе преовладуваат повеќе трендови кои може да ви бидат од полза ако сакате да пробате малку поинаков стил на декорации и да го декорирате домот поразлично од минатите години.

Кралски гламур

Станува збор за декор во кој преовладуваат белите, кремасти и златни тонови. Елката можете да ја декорирате со лампиони во овие бои и да ја дополните со жолти сијалички.

Освен тоа, просторот наоколу може да се декорира со гранчиња и свеќи.

Враќање на диско ерата

Речиси сите дизајнери се сложни дека годинава ќе имаме повторно заживување на „диско-ерата“ со декорации во форма на диско топки и светла.

Зимска бајка

Бела елка, со бели и сребрени лампиони и бела простирка под елката. Оваа декорација ќе ве потсетува на вистинска зимска бајка.

Максимализам

Овој стил е наменет за оние што сметаат дека никогаш не може да имаат премногу украси и кои сакаат да ја украсат новогодишната елка во слоеви.

Изберете разнобојни лампиони и декорации во силни бои и не се плашете дека сте претерале.

Скапоцени камења

Годинава во тренд се и декорациите во боите на скапоцени камења. Изберете рубин црвени, смарагдно зелени или сини како сафир декорации и искомбинирајте ги.

Ова е идеално решение за оние што сакаат покласични декорации, без премногу да експериментираат.

Розов Божиќ

Ако сте од оние што ја обожаваат розовата боја, тогаш оваа тема сигурно ќе ви се допадне.

Изберете декорации во сите нијанси на розовата боја и соодветно декорирајте го и животниот простор.

Украси од џинс

Елка украсена со сини или златни лампиони и рачно изработени детали од џинс (цвеќиња, панделки, подлога).

Овој стил може да им се допадне на оние што сакаат сами да си ги изработат декорациите и не се плашат да поминат и неколку денови во уредување на просторот.

Б. С. Б. | Црнобело